भांगरभूंय | प्रतिनिधी
वास्कोः बिट्स पिलानींत आत्महत्या करपाची आनीक एक धक्को दिवपी घडणूक उजवाडाक आयल्या. इलॅक्ट्रॉनिक्स अँड कम्युनिकेशन इंजिनियरिंग (ECE) च्या तिसऱ्या वर्सांत शिकपी 20 वर्सां पिरायेचे विद्यार्थीनीन आत्महत्या केली. हॉस्टेलाच्या कुडींत ही आत्महत्येची घडणूक घडिल्ल्यान कॅम्पस वाठारांत बोवाळ निर्माण जालां.
आत्महत्या केल्ली विद्यार्थिनी मूळ कर्नाटकांतल्या बेंगळुरूच्या हरलूरची आशिल्ल्याची सूत्रांनी सांगलें. बिट्स पिलानीचे जनसंपर्क अधिकारी (PRO) अर्जुन हलांकार हांणी हे विशीं पुलिसांक कळयले.
वेर्णा पुलिसांनी हे प्रकरण आकस्मिक मरण म्हूण नोंद करून ह्या प्रकरणाची चवकशी सुरू केल्या. विद्यार्थिनीन नेमकी आत्महत्या कित्याक केली हाचे कारण अजून स्पश्ट जावंक ना. हे घडणुके फाटले कारण सोदून काडपा खातीर फुडली चवकशी सुरू आसा अशें पुलिसांनी सांगलें.
मजगतीं, बिट्स पिलानींत विद्यार्थ्यांनी आत्महत्या करपाच्यो जायत्यो केशी घडल्यात. 16 ऑगस्टाक अर्थशास्त्र आनी संगणक विज्ञान फाट्यांच्या तिसऱ्या वर्सांत शिकपी विद्यार्थ्याक गूढ रितीन मरण आयिल्लें. 20 वर्सां पिरायेच्या विद्यार्थ्याचें नांव कुशाग्र जैन आनी तो मूळ उत्तर प्रदेशांतलो आशिल्लो. हाचे आदीं उत्तर प्रदेशांतल्या लखनौ शारांतल्यान शिक्षण घेवपा खातीर आयिल्ल्या कृष्णा कासेरा ह्या विद्यार्थ्याक 1 मे 2025 दिसा मरण आयिल्लें. ताचे आदीं गोंयच्या अथर्व देसाय ह्या विद्यार्थ्याक 5 मार्च 2025 दिसा मरण आयिल्लें, जाल्यार उत्तर प्रदेशांतल्या गाझियाबाद शारांतल्यान आयिल्ल्या ओम प्रियांश सिंग हाका 11 डिसेंबर 2024 दिसा मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
