भांगरभूंय | प्रतिनिधी
कुशावती जिल्ह्या खातीर पॅकेज ना, गोंयां खातीर खाशेली घोशणाय ना
लोकप्रधान अर्थसंकल्प
केंद्रीय अर्थमंत्री निर्मला सीतारमण हांणी सुदारणा आदारीत आनी लोकप्रधान असो विकसीत भारत अर्थसंकल्प सादर केला. भांडवल खर्चांत वाड, नाल्ल आनी काजू उत्पादनाक अर्थीक मजत, वखदां उद्देगा खातीर खाशेली तजवीज, हाका लागून शेतकारांची येणावळ वाडटली आनी संवसारीक अर्थवेवस्थेचे दिशेन चालू आशिल्ली भारताची प्रगती वेगान जातली: डॉ. प्रमोद सावंत, मुख्यमंत्री
पणजीः कुशावती जिल्ह्या खातीर खाशेल्या निधीचो वा गोंयचो उल्लेख आशिल्ली खंयचीय खाशेली घोशणा वा येवजण केंद्रीय अर्थसंकल्पांत ना. हाका लागून गोंय आनी गोंयकारांची निरशेणी जाल्या. दर्यादेगेवेल्या वाठारांनी नाल्ल आनी काजू उत्पादन वाडोवपा खातीर एक खाशेली येवजण चालीक लायतले. हाचो मात फायदो गोंयाक जातलो.
केंद्रीय अर्थसंकल्पा पयलीं अर्थमंत्री निर्मला सीतारमण हांणी राज्यांच्या मुख्यमंत्र्यांची बसका घेतिल्ली. मुख्यमंत्री डॉ.प्रमोद सावंत हाजीर आशिल्ले. मुख्यमंत्र्यान कुशावती जिल्ह्या खातीर 500 कोटी रुपयांचे पॅकेजी वांगडा 4 हजार कोटी रुपया निधीची मागणी केल्ली. कुशावती जिल्ह्याचो आकांक्षी जिल्ह्यांत आस्पाव करचो. मुळावी बांदावळ, पर्यटन, रोजगार निर्मिती खातीर 500 कोटी रुपयांचो निधी दिवचो, अशें सागिल्लें. आकांक्षी जिल्ह्यांक, कुशावती वा हेर राज्यांतल्या नव्या जिल्ह्यांक खाशेलो निधी दिवपाचो अर्थसंकल्पांत उल्लेख ना. हाचे भायर मडगांवां नव्या रेल्वे स्टेशना खातीर 160 कोटी रुपया, दर्यादेगेची धूप आडावपा खातीर 600 कोटी रुपया, उद्देगीक मार्गांच्या उदरगती खातीर 1000 कोटी रुपया, कोयर वेवस्थापन करपा खातीर 600 कोटी रुपयांची मागणी मुख्यमंत्र्यान केल्ली. नवे रेल्वे स्टेशन आनी कोयर वेवस्थापन हांचोय उल्लेख ह्या अर्थसंकल्पांत नाशिल्लो.
दरेका जिल्ह्यांत उच्च शिक्षण घेवपी बायलां खातीर वसतीघरांची तजवीज आनी दर्यादेगेवेल्या वाठारांनी जहाज बांदपा खातीर व्हड प्रमाणांत तजवीज केल्यार गोंयचो फायदो निश्चीतपणान जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
