भांगरभूंय | प्रतिनिधी
नवी दिल्ली: फेब्रुवारींत ६ व्हडले बदल जातले. ते आमच्या जिविताचेर परिणाम करतले. सिगरेट आनी तंबाखूचीं उत्पादनां आयच्यान म्हारग जाल्यांत. तशेंच आतां नव्यो गाडयो, जीप आनी व्हॅना खातीर FASTag जारी करतना केवायव्ही (नो युवर व्हेईकल) प्रक्रियेची गरज ना. हाचे भायर १९ किलो वेपारी गॅस सिलिंडर १ फेब्रुवारी सावन रु. ५० मेरेन म्हारग जाला.
१. जीएसटी वाडली, सिगरेट ४०% मेरेन म्हारग
३ सप्टेंबर २०२५ दिसा केल्ल्या बदला उपरांत आतां पान मसालो, खैनी आनी गुटखा सारकिल्ल्या तंबाखूच्या उत्पादनांक १ फेब्रुवारी सावन ४० टक्के जीएसटी मेळटली. उपकर (सेस) काडून उडयला. आतां मेरेर हांचेर २८ टक्के जीएसटी वांगडाच ‘कम्पेंसेशन सेस’ लायताले. हाका लागून वट्ट कर ५०% परस चड जातालो.
तशेंच सिगरेटांची लांबाय पळोवन नवो अबकारी कर लागू जातलो. हो अबकारी कर दर स्टिक मेरेन रु. २.०५ ते रु. ८.५ मेरेन आसतलो. ते भायर सिगरेटीक तंबाखूच्या उत्पादनां प्रमाण ४० टक्के जीएसटीय आकर्शीत करतले. तशेंच विडयेवेलो जीएसटी १८ टक्क्यांनी देंवला.
२. FASTag वापरप्यां खातीर KYV सत्यापनाची गरज ना
आयच्यान नव्यो गाडयो, जीप आनी व्हॅना खातीर FASTag जारी करतना आतां केवायव्ही (नो युवर व्हेईकल) प्रक्रियेची गरज ना. नव्या गाडयां खातीर केवायव्ही प्रक्रिया बंद करपाचो निर्णय भारतीय राष्ट्रीय म्हामार्ग प्राधिकरणान घेतला.
तशेंच पयलींच फास्टटॅग आशिल्ल्या वाहनांच्या मालकांक आतां नेमान केवायव्ही करपाची गरज ना. हाका लागून वाहन मालकांक वैध कागदपत्रां आसून लेगीत लांब सत्यापन प्रक्रियेची वाट पळोवची पडची ना.
कागाळ मेळ्ळ्या उपरांतच चवकशी करतले
प्राधिकरणाच्या म्हणण्या प्रमाण केवायव्ही प्रक्रिया पुरायपणान रद्द जावंक ना, जाल्यार ती ‘गरजे प्रमाण’ केल्या. आतां FASTag गैरवापर, चुकीचें जारी करपाची वा लुकसाण जावपाची कागाळ आसतली तेन्नाच केवायव्ही मागतले. सामान्यपणान काम करपी FASTag खातीर परतून खंयचेच दस्तावेज मागचे नात.
३. वेपारी सिलिंडरांचे दर ५० रुपया मेरेन वाडले
आयच्यान १९ किलो वेपारी गॅस सिलिंडर ५० रुपया मेरेन म्हारग जाला. दिल्लींत ताचो दर ४९ रुपया वाडून रु. १७४०.५० जाला. हाचे पयलीं रु. १६९१.५० इतल्या मोलान मेळटाले.
४. आरबीआयची बसका ४ ते ६ फेब्रुवारी मेरेन, व्याजदर ०.२५ टक्क्यांनी उणें करूं येतात
भारतीय रिझर्व्ह बँकेच्या चलन धोरण समितीची बसका ४ ते ६ फेब्रुवारी मेरेन जातली.
२०२५-२६ वित्तीय वर्साची ही निमाणी बसका आसतली. हे बसकेंत रिझर्व्ह बँकेन व्याजदर ०.२५ टक्क्यांनी ते ५ टक्क्यांनी उणे करूं येतात अशी अपेक्षा आसा. अशें जालें जाल्यार रीण सवाय जातलें आनी तुमचो ईएमआयय उणो जावं येता. हाचे आदीं आरबीआयन ३-५ डिसेंबराक जाल्ले आदले एमपीसी बसकेंत रेपो दर ०.२५ टक्क्यांनी उणो करून ५.२५ टक्क्यांनी केल्लो. अंदूं फकत ऑगस्ट आनी ऑक्टोबरांत जावपी बसकांनी तातूंत बदल जावंक ना.
५. विमान इंधनाचें दर उणें जाल्ल्यान विमान तिकीट सवाय जावंक शकतात
फेब्रुवारींत हवाई प्रवाशांनी सुटका मेळपाची शक्यताय आसा. तेल कंपनींनी विमान इंधनाचें दर सुमार एक हजार रुपया उणे केल्यात. दिल्लींत इंधनाचे दर रु. ९२,३२३.०२ वयल्यान दर किलोलीटर रु. ९१,३९३.३९ मेरेन देंवल्यात. हाका लागून विमान कंपनींचो कार्यकारी खर्च उणो जातलो, जाचो विमान तिकीटांचे दर उणे करपाच्या रुपांत प्रवाशांक फायदो जावंक शकता.
६. मालमत्तेची विक्री आनी खरेदी करपाक गरजेचें आधार प्रमाणीकरण
उत्तर प्रदेश आनी कर्नाटक सरकारांनी १ फेब्रुवारी २०२६ सावन मालमत्तेच्या नोंदणी खातीर आधार प्रमाणीकरण सक्तीचें केलां. आतां नोंदणी करतना खरेदीदार, विक्रेतो आनी साक्षीदारांनी आपली वळख म्हळ्यार बोटांचे छाप वा तोंड उपनिबंधक कार्यालयांत आशिल्ल्या बायोमेट्रीक मशीनाचेर तपासची पडटली.हाचो मुखेल हेत म्हळ्यार जमनीची खरेदी-विक्री हातूंत फटवणूक आनी ‘बेनामी’ मालमत्ता तपासप. केंद्राच्या ‘एक राष्ट्र, एक नोंदणी’ येवजणे खाला देशभर बेगीन ही चालीक लावपाची येवजण आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
