भांगरभूंय | प्रतिनिधी
नितीन नबीन : 2027 चे वेंचणुके आराखडो तयार
भांगरभूंय । प्रतिनिधी
पणजी : भाजप पदाधिकाऱ्यांनी गोंय विधानसभा वेंचणूक भोवमतान जिखचे खातीर आराखडो तयार केला. कार्यकर्ते, बूथ पांवड्या वयल्या पदाधिकाऱ्यांनी हाची अंलबजावणी करची. 2027 चे वेंचणुकेंत दरेका बुथाचेर उण्यांत उणीं 50 टक्के मतां मेळटलीं असो निश्चेव करचो, असो सल्लो भाजप राष्ट्रीय अध्यक्ष नितीन नबीन हांणी दिलो.
शेनवारा पणजे जाल्ल्या कार्यकर्ता संमेलनांत नबीन उलयताले. ह्या वेळार मुख्यमंत्री डॉ. प्रमोद सावंत, प्रदेशाध्यक्ष दामू नायक, केंद्रीय मंत्री श्रीपाद नायक, नगर नियोजन मंत्री विश्वजीत राणे आनी हेर मंत्री, आमदार उपस्थीत आशिल्ले.
नबीन हांणी सांगलें, गोंय भाजपा खातीर शूभ आसा. 2012 त भाजप सत्तेर आयलो आनी 2014 त केंद्रांत सत्ता मेळ्ळी. ते उपरांत लेगीत असो क्रम चालूच आसा. 2027 चे राज्याचे आनी 2029 चे देशाचे वेंचणुकेंत लेगीत भाजपाचें कमळ फुलतलें. फाटल्या 14 वर्सांत गोंयांत भाजपान खूबसीं उदरगतीचीं कामां केल्यांत. हांगा विमानतळां, म्हामार्ग, उड्डाण पूल बांदल्यात. भाजप सरकार अंत्योदय तत्वाचेर काम करता. सुशासन दिवपा सयत राष्ट्र निर्माणाचें काम लेगीत भाजप करता.
भाजप कार्यकर्त्यांनी डबल इंजीन सरकारान केल्ली उदरगत लोकां मेरेन पावोवची. भाजप सरकारान गोंयांत 33 हजार कोटी रुपयांचीं उदरगतीचीं कामां केल्ल्याचें लोकांक सांगचें. त्याच वेळार आदल्या काँग्रेस सरकारान केल्ल्या भ्रश्टाचाराची म्हायती दिवची. भारताच्या स्वातंत्र्या उपरांत गोंय मुक्तीक 14 वर्सां कळाव खंयच्या फुडाऱ्याक लागून जालो, हें लेगीत तांकां सांगचें, अशें नबीन हांणी सांगलें. शिस्त, समर्पण, निर्धारान पक्ष संघटणे सयत देशाक फुडें व्हरपाचें काम करुया. राजकारण हें मॅरेथॉन आसा. हांगा गती परस स्टॅमिना म्हत्वाचो आसता, हें समजून घेवचें, अशेंय नबीन हांणी सांगलें.
मुख्यमंत्री डॉ. प्रमोद सावंत हांणी सांगलें, नितीन नबीन हे भाजपाचे नवे बीग बॉस आसात. तांचे भोंवडेक लागून गोंयांतल्या भाजप कार्यकर्त्यां मदीं नवी उमेद आयल्या. भाजप डबल इंजिनान केल्लीं उदरगतीचीं कामां, अंत्योदय तत्वाचेर केल्लें काम हाका लागून 2027 त गोंयांत परतून भाजप सरकार येतलें, हाची आमकां खात्री आसा. म्हापालिका, नगरपालिका, फोंडें विधानसबा पोटवेंचणुकेंत लेगीत भाजप जिखतलो, अशें तांणी सांगलें.
2027 त 27 जाग्यांची मोख
नितीन नबीन हांणी दोन दीस केल्ल्या मार्गदर्शना प्रमाण कार्यकर्त्यांनी वाटचाल करची. 2027 विधानसभा वेंचणुकेंत भाजपाक 27 जागे जिखून दिवप ही आपली मोख आसा. सेगीत चवथे खेपे गोंयांत भाजप सरकार हाडून प्रधानमंत्री नरेंद्र मोदी हांकां भेट दिवया, अशें प्रदेशाध्यक्ष दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
