कल्पना चावला

भांगरभूंय | प्रतिनिधी

भावंडांनो,
दरेक भावंडां आपलें शिक्षण घेतना वेगवेगळीं सपनां बाळगितात. तीं पुराय करपा खातीर आपले परीन आनी घरांतल्या मनशांच्या आदाराचेर कश्ट करीत तीं वावरत आसतात. भावंडांनो, तुमचे वरीच अशेच एके चलयेन आपलें शिक्षण घेतना अंतराळांतल्यान भारत भुंयेचें दर्शन घेवपाचो ध्यास बाळगिल्लो. तो पुराय करपा खातीर आपलें शिक्षण पुराय करतना, तिणें खर प्रशिक्षण घेतलें. आनी एसटीएस- 87 मिशना खातीर ती आखाड्यांत देंवली. आपले खर मेहनती वरवीं तिणें यत्न चालू दवरले. त्या यत्नांचेरच मिशन स्पेशलिस्ट म्हण तिची निवड जाली. अवकाश वीर म्हूण निवड जावन स्पेस शटलांतल्यान अवकाशांत वचपी ती पयली भारतीय महिला थारली. भावंडांनो, कोणा विशीं उलयतां तें तुमच्या लक्षांत आयलांच आसतलें. हय हांव उलयतां तें आमची अंतराळ विरांगना कल्पना चावला हांचे विशींच.
भावंडांनो, कल्पना चावला ही हरयाणांतल्या कर्नाल गांवांत जल्मल्ली. थंयच्या रवींद्रनाथ टागोर विद्यालयाची हुशार आनी जिद्दी विद्यार्थीनी म्हूण नांव मेळयिल्लें. उपरांत तिणें चंदीगडांतल्या इंजिनियरींग म्हाविद्यालयांत एयरोनोटीकल इंजिनियरींग विशयांतली बीएससी पदवी मेळयली. कश्ट आनी जिद्दीच्या नेटान अमेरिकेंतल्या टेक्सस विद्यापिठाची एमएससी पदवी मेळयत ती एक वेगळीच वाट चलूंक लागली. एयरोस्पेस आनी मेकानिकल विशयांत पदव्युत्तर शिक्षण घेतले उपरांत 1988 वर्सा एकरोस्पेस इंजिनियरींगल्याण दोतोरकी मेळयली.
भावंडांनो, हुशार आशिल्ल्या कल्पनान 1988 वर्सा नासाच्या एमस रिसर्च सेंटरांत काम करपाक सुरुवात केली. मुखार 1993 वर्सा लॉस एल्टासांत ओव्हरसेट मॅथडस कंपनींत उपाध्यक्ष पदाचो पदभार सांबाळ्ळो. मात, अंतराळांत वचपाची तिची इत्सा तिका सवकासायेन बसूंक दिनाशिल्ली. नासा हे अमेरिकेंतल्या अवकाश संशोधन संस्थेंत अवकाशवीर जावपाचे परिक्षे खातीर अर्ज भरलो. सुमार 2962 उमेदवारांतल्यान एस्ट्रोनॉट कंडिडेट म्हूण तिची निवड जाली. भावंडांनो, 19 नोव्हेंबर 1997 दिसा कल्पना, आनीक पांच अवकाशविरां सयत कोलंबिया स्पेस शटलांतल्यान अंतराळांत गेली. एका उपगिऱ्याक मळबांत प्रक्षेपीत करपाची जापसालदारकी कल्पनाचेर सोंपयिल्ली. त्या पयल्या अंतराळांतल्या प्रवासांत कल्पनान धर्तरे भोंवतणी 252 प्रदक्षिणा घालीत 375 वरांची भोंवंडी केली. अशी अंतराळवीर म्हूण दोन खेपे निवड जावप हें दुर्मिळ. पुणून कल्पनान तें जैत जोडलें. एसटीएस 107 मिशना खातीर 2000 वर्सा तिची परतून निवड जाली. हे भोंवडेचो समारोप करतना 1 फेब्रुवारी 2003 दिसा कोलंबिया यान धर्तरेचेर परतुपाचें आशिल्लें. पूण अचकीत यानांत इबाड जालो आनी ताचो स्फोट जावन कल्पना चावला सयत स अंतराळविरांक मरण आयलें. तांकां सगळ्यांक याद करूया.
उल्हासभाई