भांगरभूंय | प्रतिनिधी
दुबावीत ट्रक ड्रायव्हराक कर्नाटक पुलिसांनी घेतलो ताब्यांत
म्हापशेंः करासवाडो, म्हापशेंच्या उद्देगीक वसणुकेंत म्हाल येरादारी करपी ट्रका सकयल चिड्डून एकल्याक मरण आयलें. अपघाता उपरांत वाहना सयत पळून गेल्ल्या ट्रक ड्रायव्हराक म्हापशें पुलिसांनी कर्नाटक पुलिसांच्या मजतीन ताब्यांत घेतलो.
हो अपघात शुक्रारा, 30 वेर रातीं 11.30 वरांच्या सुमाराक कळ्ळो. मेल्लो मनीस हो बेवारस आसून फाटल्या कांय दिसां सावन तो उद्देगीक वसणुकेंतल्या जिनो फार्मास्युटीक्लस कंपनी लागसारच्या मुखेल रस्त्यार न्हिदतालो.
अपघाताच्या दिसा रस्त्याच्या कुशीक पार्क आशिल्ल्या अवजड म्हाल येरादारी ट्रका सकयल तो निदिल्लो. दुबावीत ट्रक ड्रायव्हराक ताचो अदमास येवंक ना आनी मेल्लो मनीस हो ट्रकाच्या टायरा सकयल चिड्डलो आनी गंभीर जखमी जावन ताका जाग्यारुच मरण आयलें. ते उपरांत दुबावीत ट्रक ड्रायव्हरान ट्रका सयत घडणूक सुवातेवेल्यान पळ काडलो
अपघाताची म्हायती मेळ्ळे उपरांत म्हापशें पुलिसांनी वचून पंचनामो केलो. आनी कूड पोस्टमॉर्टमा खातीर जीएमसींत धाडली. तशेंच पुलिसांनी ह्या अपघाताक कारण थारिल्ल्या ट्रकाची वळख पटोवपाक शेजारच्या महाराष्ट्र आनी कर्नाटक पुलिसांक सादूर केले. तो मेरेन ट्रक सावंतवाडीच्यान मुखार पाविल्लो.
शेनवारा दनपरां सुपा कर्नाटक पुलिसांनी ह्या ट्रका सयत दुबावीत ड्रायव्हराक ताब्यांत घेतलो. ही म्हायती मेळ्ळे उपरांत म्हापशें पुलीस पंगड दुबाविताक ताब्यांत घेवपाक कर्नाटकांत गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
