गोंय जमीन वापर कायद्या आड राज्यांत भूंय रुपांतरण : फेर्दीन रिबेलो

भांगरभूंय | प्रतिनिधी

भांगरभूंय । प्रतिनिधी
पणजीः राज्यांत जमीन रुपांतरण आड गोंय जमीन वापर (नियमन) कायदो अस्तिवांत आसा. पूण ह्या कायद्याचें उरफाटे नगर नियोजन खात्याच्या 17(2) आनी 39 (अ) कलम सकयल रुपांतरण चल्लां. सरकारान ही भुंय रुपांतरणा रद्द करची आनी कोण गोंयकार भाव आपले घर वाडोवपाक सोदता जाल्यार ताका मेकळीक दिवची. पूण व्हडा प्रमाणांत भूंय रुपांतरीत करची न्हय, अशी मागणी निवृत्त न्यायाधीश न्या. फेर्दीन रिबेलो हांणी केली.
आनी सोंसूं नजो हे चळवळी विशींची अधिक म्हायती दिवपा खातीर पर्वरी जाल्ले पत्रकार परिशदेंत रिबेलो उलयताले. ह्या वेळार समाज वावुरपी एल्विस गोम्स आनी फ्रान्सिस कोएल्हो हाजीर आशिल्ले.
टीसीपी कलम 17(2)ची मार्गदर्शक तत्वां उच्च न्यायालयान रद्द केल्यांत. देखून हे कलम रद्द करचे सोडून ह्या कलमांत उच्च न्यायालयान दिल्ल्या आदेशाच्या आदाराचेर सुदारणा घडोवम हाडची, अशें रिबेलो हांणी मागणी केल्या.
ह्या आदेशाक लागून प्रादेशिक आराखड्यांत महत्वाचें बदल करप शक्य नाशिल्लें कारणान टीसीपीन कलम 16 ब च्या जाग्यार कलम 39(अ) हाडलां. ह्या कलमा खाला पयशे दिवन शेत जमीनीचें रुपांतर सेटलमेंटांत टीसीपी मंडळ करून पुराय प्रादेशिक आराखडो बदलपाक सोदता. जाल्यार 17(अ) खाला भारतीय सर्वेक्षक जनरल हांणी थारयिल्ले बाह्यरेखेचें उल्लंघन करून दोंगर कापपाक मेकळीक दिल्या, अशें रिबेलो हांणी म्हणलें.
कलम 17 (2) सकयल प्रादेशिक आराखड्यांत त्रुटी आसा अशें सांगून खंयच्या भुखंडाचे झोन जाय तसो बदलपाक टीसीपीक मेकळीक मेळटा. हातूंत कसलीच भौशिक कळोवणी वा सुचोवण्यो मागोवपाची तरतूद ना. 31 डिसेंबर 2024 मेरेन 342 मालमत्तेचें रुपांतरण जाला, तातूंतल्या 244 मालमत्तेचें आमका तपशील मेळल्यांत. ह्या तपशीला प्रमाण 2,40,577 चौ. मी इतले भुंय रुपांतर हे काळा मजगतीं जालां, अशें रिबेलो हांणी सांगलें.
कलम 39(अ) खाला टीसीपी खंयच्याय भूंखडाचो झोन बदलपा खातीर दिसाळ्यांत वा राजपत्रांत भौशिक कळोवणी जारी करता. ह्या कलमांत नो डेव्हलमपेंट स्लोप, सकयल्या वाठारांतली शेतां आनी सीआरझेड वाठारांचो आस्पाव ना. 22 जानेवारी 2025 मेरेन 199 मालमत्तेचो झोन रुपांतरणाचो प्रस्ताव ह्या कलमा सकयल आसा आनी 170 अर्ज हे रुपांतरणा आड दाखल केल्यांत. 17,26,902 चौ. मी. भूंय रुपांतरणाचो सद्या प्रस्ताव आसा, अशी म्हायती रिबेलो हांणी दिली.
पयलींचे सरकारान शेतां जमनी राखपा खातीर खुबशे कायदे हाडिल्ले. वर्स 1991त सरकारान गोंय जमीन वापर (नियमन) कायदो अंमलात हाडून कलम 2 सकयल शेतकी जमीनींच्या रुपांतरणाचेर बंदी हाडली. फक्त शेतकी सोडून हेर गजालीं खातीर हाचो वापर जावपाक शकना. तशेंच कोड ओफ कोम्युनिदादी भितर सुदारणा करून कलम 31 (अ) खाला जी कुळाची शेत जमनी आसात तांचो बिगर शेतकी वापर करपाचेर बंदी हाडली, अशें रिबेलो हांणी सांगलें.
पूण आतां लोकप्रतिनिधींनी गोंयचो विश्वासघांत करून ह्या भुंय रुपांतर आड अस्तिवांत आशिल्ल्या कायद्या आड 2023 पयली कायद्यांत सुदारणा हाडून डेव्हलपर्साच्या फायद्या खातीर शेत आनी हेर शेतकी जमीनीचें रुपांतरणाक मंजूरी दिली, असो आरोप रिबेलो हांणी केलो.
पयलीं 2018त 16 (ब) कलम हाडलो आनी उपरांत तो रद्द केलो. गोंय शेतकी जमीन हस्तांतरण निर्बंध कायदो 2023 अधिसुचीत करून जर शेत जमीनीचो वापर शेता खातीर जायना जाल्यार शेत सोडून टीसीपी कायद्या खाला जो आराखडो तयार जाला ते आराखड्यांक हे जमीनीत मान्यताय दिवपाक मेळळीक दिली. देखून गोंय जमीन वापर कायदो अस्तिवांत आसून लेगीत कुळाचे शेत जमीनींचो रुंपांतरण बांदकामा खातीर चल्लां, असो युक्तिवाद रिबेलो हांणी केलो.