इन्शुरेंसाचे पयशे मेळोवपा खातीर तणाट्यांची हत्या

भांगरभूंय | प्रतिनिधी

युपींत महिला आयपीएसान हाडलें ‘इन्शुरेंस क्लेम सिंडीकेट’ रॅकेट उक्ताडार

संभलः उत्तर प्रदेशांतल्या संभल जिल्ह्यांतल्यान एक धक्को दिवपी घडणूक मुखार आयल्या. विम्याचें पयशे घेवपा खातीर जिवे लोकांची हत्या करपी आंतरराज्य टोळी उक्ताडार आयली. सुमार 100 कोटी रुपयां परस चड व्याप्ती आशिल्ल्या ह्या विमो महाघोटाळ्याक उक्तडार हाडपाक 2020 बॅचाचो आयपीएस अधिकारी आनी संभलची अतिरिक्त पुलीस अधीक्षक (ASP) अनुकृती शर्मा हांची मुखेल भुमिका आशिल्ली. अमेरिकेंतली लक्झरी जीण आनी पीएच.डी.चे शिक्षण सोडून भारतीय पुलीस सेवेंत सामील जाल्ली अनुकृती शर्मा हांच्या ह्या कर्तव्याक लागून हजारांनी कोटी रुपयांचे विमो फटवणूक रॅकेट उक्ताडार आयलें.
ह्या पुराय प्रकरणाची सुरवात योगायोगान पूण दुबावीत घडणुकेंतल्यान जाली. नोव्हेंबर-डिसेंबर 2024 ह्या काळांत उत्तर प्रदेशांत दाट धुकें आसतना पुलीस पंगड गस्त घालतालो. पुलीस गाडी फकत 20 ते 30 किमी गतीन वतना अचकीत एका काळ्या रंगाच्या स्कॉर्पिओ गाडयेन गतीन पुलिसांच्या गाडयेक ओव्हरटेक केलें. इतले धुकें आसतना स्कॉर्पियो चालकाची गाडयेची गती पळोवन अनुकृती शर्मा हांकां दुबाव आयलो. तिणें फाटलाव करुन गाडी थांबवपाचो संकेत दिलो, पूण ड्रायव्हरान आपली गती वाडोवन पळून वचपाचो यत्न केलो. ते उपरांत पुलिसांनी नाकाबंदी करुन गाडी धरली. तपासणी केली तेन्ना गाडयेंत 11 लाख 45 हजार रुपयांची रोख रक्कम, 19 डेबिट कार्डां आनी एकाच मनशाचीं दोन वेगवेगळीं वळखपत्रां सांपडली. गाडयेंतल्या करण मिश्रा ह्या दुबाविताची चवकशी करतना जे सत भायर आयलें ते आयकून पुलीस अधिकाऱ्यांक लेगीत धक्को बसलो.
एकंदरीत हो व्हडलो घोटाळो हाची कल्पना सगळ्यांक आयली. ह्या व्हडल्या घोटाळ्याची कार्यपद्धत (Modus Operandi) खूब भिरांकूळ आनी बरीच नियोजीत आशिल्ली. हे टोळयेन मुखेलपणान गांवगिऱ्या वाठारांतल्या गरीब, अशिक्षीत आनी गंभीर दुयेंत लोकांक लक्ष्य केल्लें. ही टोळी कॅन्सर सारकिल्ल्या दुयेंसांनी मरणाक पाविल्ल्या लोकांच्या नांवान बनावट कागदपत्रांच्या आदाराचेर कोटी रुपयांचो विमो (Life Insurance) घेताली. हे खातीर दुयेंतींक निरोगी दाखयताले. विमो प्रतिनिधी आनी दलाल स्वता प्रीमियम भरताले, कारण संबंदीत व्यक्ती बेगीन मरतली हें तांकां खबर आसताले. त्या मनशाक मरण आयले उपरांत विमो कंपनीं कडल्यान मेळिल्ली व्हड रक्कम दलाल स्वता घेताले आनी तातूंतली कांय रक्कम मेल्ल्या मनशाच्या कुटुंबाक दिवन तांकां ओग्गी रावपाक सांगताले.

पूण ह्या टोळयेची क्रूरताय फकत दुयेंतींचेर थांबली ना. ह्या टोळयेन विम्याच्या पयशां खातीर जायत्या निरोगी तरणाट्यांक जिवेशी मारिल्ल्याचे चवकशेंतल्यान स्पश्ट जालां. एका मनशाच्या नांवान विमो घेवन ताका जिवेशी मारताले आनी हे मरण ‘अनवळख्या वाहनान धपको दिल्ल्यान जाल्लो अपघात’ अशें दाखयताले.
विशेश म्हळ्यार अशा प्रकरणांत थळाव्या पुलिसांनी चवकशेंत चुको दवरुन अपघाती मरणां म्हणून फायली बंद केल्ल्यो. अनुकृती शर्मा हांणी 17 पोरण्यो आनी बंद जाल्लो एफआयआर सुरू उक्त्यो केल्यो. तेन्ना खूनाच्यो 4 धक्को दिवपी केशी उक्त्यो जाल्यो. गुन्यांवकारांनी 29 बनावट मरण प्रमाणपत्रां तयार केल्लीं, जाल्यार कांय जाणांनी खऱ्या प्रमाणपत्रांचेर आशिल्ल्यो तारखो बदलून विमो दावे सादर केल्ले.
ह्या व्हड घोटाळ्याचे धागे उत्तर प्रदेश, मध्य प्रदेश, दिल्ली, उत्तराखंड, बिहार, आसाम ह्या सारक्या 12 राज्यांनी पातळ्ळ्यात. विमो कंपनी ज्या कंपनींक विमो दावे सत्यापीत करपा खातीर कंत्राट दितीत ताचेच कर्मचारी ह्या घोटाळ्याचे मुखेल मास्टरमाइंड थारले. अटक केल्लो दुबावीत करण मिश्रा ‘फर्स्ट सोल्यूशन सर्व्हिसेस’ नांवाचे कंपनींत तपास अधिकारी म्हणून काम करतालो. विमो दाव्याची प्रामाणीकता तपासपाचें काम ताका दिल्लें, देखून तो स्वता बनावट दाव्यांक मान्यताय दितालो. हातूंत गांवचो मुखेली, सचीव, आशा स्वयंसेवक आनी भलायकी खात्याचे कांय कर्मचारीय आशिल्ले, जे पयशांच्या बदलाक बनावट मरण प्रमाणपत्रां आनी वैजकी अहवाल दिताले.
आयपीएस अनुकृती शर्मा हांणी तंत्रीक तज्ञतेचो उपेग करून ह्या प्रकरणाची चवकशी केली. दुबावितांच्या मोबायल फोनांतल्यान 30 हजारां परस चड फोटोंचो डेटा जप्त केला, आनी व्हॉट्सअॅप चॅट्सांतल्यान पयशे दिल्ले-घेतिल्ल्याचे पुरावे मेळ्ळ्यात. आरोपींनी नामनेच्या लोकांच्या नांवान बँक खातीं उक्तीं केल्लीं, तांचो डेबिट कार्ड आनी सिम कार्ड आरोपी स्वता वापरताले. विमो कंपनीं कडल्यान एकठांय केल्ले पयशे सरळ ह्या खात्यांत येताले. ह्या तपासांत आतां मेरेन 52 जाणांक अटक केल्या, जाल्यार 50 परस चड आरोपी अजूनय फरारी आसात.
प्रकरणाची गंभीरताय मतींत घेवन अंमलबजावणी संचालनालय चवकशी करता. पयशे लुटपाची घडणूक सोदून काडपा खातीर सगळी कागदपत्रां जप्त केल्यांत. ह्या प्रकरणांत ‘हवाला’ वरवीं वेव्हार जाल्लो अशी खर शक्यताय आसा आनी आतां तपास एजन्सी ते दिशेन चवकशी करता. एके महिला अधिकाऱ्याच्या जागृताय आनी हट्टीपणाक लागून विमो हडपपा खातीर लोकांची हत्या करपी रॅकेट उक्तडार आयलें.