भांगरभूंय | प्रतिनिधी
मडगांवः घोगळ हावसिंग बोर्ड वाठारांतली सुन्नी गुलिस्तान मशीद दक्षीण गोंय उपजिल्हाधिकारी गणेश बर्वे हांचे उपस्थितीत सील केली. मशिदी भायर काल शुक्रारा मशिदी वयल्या वादांतल्यान अली कलंदर खान हाचेर चाकू हल्लो जाल्लो तातूंत ताका मरण आयिल्लें. शांतता आनी कायदो सुवेवस्था राखपा खातीर मशीद दोन दिसां खातीर सील केल्या.
हल्ल्यांत एकल्याक मरण
घोगळ हावसिंग बोर्डांतल्या सुन्नी गुलिस्तान मशिदी भायर अली खानाचेर चाकू हल्लो करुन ताका जिवेशीं मारलो. हे घडणुके उपरांत दक्षीण गोंय जिल्हो प्रशासनान वाठारांत शांतताय तिगोवन दवरपा खातीर फुडल्या 48 वरां खआतीर मशिद पुरायपणान बंद दवरपाचो आदेश दिला. 30 जानेवारीक पुलीस प्रशासनान सादर केल्ल्या अहवाला उपरांत जिल्हो प्रशासनान हो निर्णय घेतला. परिस्थिती पळयल्यार भौशीक शांतताय इबाडपाची शक्यताय आशिल्ल्यान खबरदारीचो उपाय म्हणून भारतीय नागरी सुरक्षा संहिता 2023च्या कलम 163 खाला ही कारवाय केल्या. ह्या काळांत कोणाकूच मशिदीच्या आवारांत प्रवेश मेळचो ना. फतोड्डें पुलीस स्टेशनाच्या तपास अधिकाऱ्याचें बरयल्ले परवानगे उपरांतच प्रवेश मेळटलो. दोन दिसांनी परिस्थितीचो नियाळ घेतले आनी थळाव्या पुलीसांच्या अहवालाचेर आदारून फुडलो निर्णय घेतले अशें नोटिशेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
