भांगरभूंय | प्रतिनिधी
उदकाचो, विजेचो वापर आपले गरजे पुरतोच करप, हेरांकय ताचो उपेग जावचो हाची काळजी घेवप ही देशभक्ती..
वर्सासंकींनीं आमी वेगवेगळे सण- सुवाळे मनयतात. आमी चवथ मनयतात, दिवाळी, नातलां मनयतात, ईद मनयतात. 15 ऑगस्ट स्वतंत्राय दीस आनी 26 जानेवारी प्रजासत्ताक दीस आमी मनयतात. ह्या दोन दिसांनी लोकांच्या देशप्रेमाचे उमेदीक ओतो येता आनी तें सभावीक आसा.
सकाळीं हाऊसींग सोसायटींत झेंडावंदन करप, देशभक्तीच्या पदांची कार्यावळी करप, हातांत तिरंगी बावटे घेवन फेरी काडप, दर वर्साच्यो कार्यावळी अशे तरेच्यो आसतात. देशप्रेम व्यक्त करपाचो सुवाळो अशे तरेन जाता.
सगळेच लोक सुवाळो मनयतात अशें न्हय. चडशे लोक सुटयेची मजा घेतात. हे फावटीं 26 जानेवारीक लागून दोन- तीन दीस सुटी आयली. खूब जाणांनी भायर भोंवून येवपाचो बेत केलो. दिसवड्याचेर काम करपी आसात, तांकां सुटी खंय मेळटा? पसरकार, वेवसायीक आपल्या कामांत आसतात. सेवाकर्मी आपलें कर्तव्य करतात.
आमचो देश कसो, केन्ना स्वतंत्र जालो, देशाचें संविधान केन्ना अस्तित्वांत आयलें हाची शिकवण शाळा- कॉलेजांत दितात. पुणून ती शिकपा पुरती! देशान आमकां कितें दिलें, कोणाकय विचारल्यार तें ताका सांगपाक येवपाक जाय. खरें म्हणल्यार देशान आमकां कितें दिलें हाचे परस आमी देशा खातीर कितें केलां, कितें करूं शकतात, हाची जाप सोदपाची गरज आसा.
देशभक्ती, देशप्रेम हें कशें आसता?… राष्ट्रीय जांव समाजीक कार्यावळींनी धवेफुल्ल कपडे न्हेसून मिरोवप, गोड उतरांनी भाशणां दिवप, सुवाळ्यांचे फोटू सोशल सायटींचेर घालप, कार्यालयांत आनी मोटारींचेर तिरंगी बावटे लावप हे सगळें देशप्रेम व्यक्त करपाचे देखावे! एका दिसा पुरतें. तो दीस सोंपलो तसो जण एकलो आपापल्या कामांत घुस्पून उरता.
देशभक्तीचो अर्थ देशा विशीं आदर, अभिमान. स्वातंत्र्यपूर्व काळांत देशभक्तीचो अर्थ आशिल्लो पारतंत्र्यांतल्यान मुक्तताय मेळपा खातीर केल्ले यत्न. स्वातंत्र्य मेळोवपा खातीर अनेकांनी आपलो जीव वगडायलो. जायते जाण्यांच्यो नोकऱ्यो गेल्यो. खूब जाणांनी बंदखणींत हाल- अपेश्टा काडल्यो. …आमचे पिळगेंतल्या अनेकांचो जल्म स्वतंत्र भारतांत जाला. ताका लागून गुलामगिरीचो काळ आमी अणभवलोना, पुस्तकांत वाचला. गोंयांत पुर्तुगेजांच्या मुस्ती़ंतलो काळ आमचे मदल्या कांय जाणांनी अणभवला. भारतांतल्या गुलामगिरीचो काळ ताचे आदीं संपुश्टांत आयलो.
स्वातंत्र्यपूर्व काळांत, प्रभात फेरयो काडप, सत्याग्रह करप, बंड करप, विदेशी कपड्यांचेर बहिश्कार घालप, सरकारी नोकरी सोडप, ब्रिटीश सरकाराच्या पुलिसांचो मार खावप, बंदखणींत वचप असल्यो गजाली घडल्यो. हातूंतली खंयचीच गजाल आतां लागू जायना. तेन्नाची देशभक्ती अशी आशिल्ली.
आयची देशभक्ती ताचे परस वेगळी. आयजय जन आंदोलनां जातात. बंड, चळवळी जातात. पुणून तांचें स्वरूप वेगळें. देशा मुखार आयज विंगड- विंगड प्रस्न उबे आसात. आतंकवाद, भ्रश्टाचार, गुन्यांवकारी, म्हारगाय. अनेक समाजसेवक फुडें येतात. जन- जागरुकताय निर्माण करतात. अशें आसूनय गैरवेव्हार जायत आसात. चळवळीचें स्वरूप बदल्लां तरीय आयज स्वतंत्र भारतांत आपल्या हक्कां खातीर झगडपाचो दर एका नागरिकाक अधिकार आसा.
व्यक्ती आनी समाज हांचे एकामेका वांगडा एक नातें आसा. व्यक्तींतल्यान समाज घडटा. व्यक्ती आनी समाज हांच्यो एकामेकां कडल्यान खेरीत अपेक्षा आसात. आपल्यो स्वताच्यो गरजो एक व्यक्ती भागोवंक शकना. तातुंतल्यान समुदायाचें म्हत्व वाडत गेलां. आयची देशभक्ती कशे तरेची आसा? संविधानाचें पालन करप, कायदे वेवस्थीत पाळप ही देशभक्ती. येरादारीचे सगळे नेम पाळप, वाहन सादूरतायेन चलोवप, वाहन चलयतना अपघात जावचो न्हय हाची काळजी घेवप ही देशभक्ती…. उदकाचो, विजेचो वापर आपले गरजे पुरतोच करप, हेरांकय ताचो उपेग जावचो हाची काळजी घेवप ही देशभक्ती… शिक्षकांनी बरे तरेन शिकोवप, विद्यार्थ्यांक सुसंस्कृत नागरीक घडोवप ही देशभक्ती… सरकारी जांव खाजगी कर्मचाऱ्यांनी आपलें काम वेवस्थीत करप, लांच घेवप ना ही देशभक्ती… अश्यो एक आनी दोन न्हय… जण एकल्यान आपल्या वांट्याक येतात तीं दिसपट्टी कामां निसुवार्थींपणान करप ही देशभक्ती.
देशभक्ती हो फकत एक शब्द न्हय, ती एक भावना. ताचो अर्थ देशा विशीं मोग, आदर, निश्ठा. देशभक्तीची ही भावना फुडल्या पिळग्यां मेरेन पावंक जाय. भुरग्यांक उत्सुकताय आसता जाणा जावपाची, सव्वीस जानेवारीक प्रजासत्ताक दीस कित्याक म्हण्टात? प्रजासत्ताक दीस आनी स्वतंत्रता दीस हातूंतलो फरक कितें? पालक ह्या नात्यान तांच्या प्रस्नाच्यो योग्य जापो आमी तांकां दिवंक जाय. तांच्या गिनान्यांत भर घालूंक जाय. राष्ट्रीय सुवाळे भुरग्यां वांगडा मनोवंक जाय.
हाऊसिंग सोसायटीच्या झेंडा वंदनाच्या कार्यावळींनी ल्हान व्हडांनी एकठांय येवंक जाय. केन्ना केन्ना राष्ट्रीय म्युझियमाक भेट दिवप, आमच्या दीसपट्ट्या संभाशणांत संविधान कशें घडलें, वंदे मातरम कोणें बरयलें, जन गण मन राष्ट्रगीत कोणें बरयलें, गीतांचो अर्थ कितें हाची खरी म्हायती आमी भुरग्यांक दिवंक जाय.
मोग शिकोवन येना, काळजांतल्यान येता. देखीक भुरग्यांक आवय- बापायचो मोग करपाक कोण शिकयना. आपल्या घरच्यांचो, आपल्या गांवचो, आपल्या प्रांतांचो मोग सभावीक आसता. देशप्रेम संस्कारांतल्यान येता. 146 कोटी लोकसंख्येचो आमचो देश. देशाचो कारभार प्रधानमंत्री आनी ताचें मंत्रीमंडळ चलयता. अर्थमंत्री अर्थ खातें सांबाळटा, अर्थतज्ञ ताका मदत करतात. शिक्षण मंत्री शिक्षण खातें सांबाळटा, शिक्षक आनी प्राध्यापक न्हय. शेतकी मंत्री शेतकी खातें पळयता, शेतकामती न्हय.
देशाचे जबाबदार नागरीक ह्या नात्यान आमचे हक्क आनी आमचीं कर्तव्यां आसात. देशाच्या सद्यस्थितीचें गिन्यान, म्हायती आसप खूब म्हत्वाचें. देशप्रेम आनी राष्ट्रीयत्वाची भावना सदांच आमच्या मनांत आसूंक जाय. ताका लागून देशाच्या शिक्षण, पर्यावरण, समाजसेवा आनी अर्थीक उदरगतींतल्यान देशा खातीर खूब कितें करपाची उमेद आमकां जाता. आनी तसो विचार केल्यार, राजकारणी आनी जनता आमी सगळे मेळून देशाचो वेव्हार चलयतात. दर एकल्याची भूमिका आनी कार्यां वेगळीं आसतात. आपापल्या पांवड्या वेल्यान आमी देशसेवा करतात. हीच आपली देशभक्ती जावन आसा…
अरूण काकोडकार
9822588852
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
