भांगरभूंय | प्रतिनिधी
कर्मचारी भरती आयोगान इत्सुकां कडल्यान मागले अर्ज
पणजी : राज्य कर्मचारी भरती आयोगान कोंकणी शाळांनी ३८ शिक्षकांची पदां जाल्यार मराठी मुळाव्या शाळांनी ३५२ पदां भरपा खातीर जायरात दिल्या. पात्र आनी इत्सून उमेदवारांनी ऑनलायन स्वरूपांत २० फेब्रुवारी २०२६ मेरेन अर्ज करप गरजेचें. अर्ज https://gssc.goa.gov.in हे वेबसायटीचेर भरून सादर करप गरजेचें. कोंकणी शिक्षकांच्या ३८ पदां मदलीं १९ पदां सर्वसामान्यां खातीर आसात. उरिल्लीं ओबीसी खातीर १५ तर ४ पदां इडब्ल्यूएस खातीर राखीव आसात. ३८ पदां मदल्या ८ पदां दिव्यांगां खातीर राखीव आसात.
मराठी शिक्षकांच्या ३५२ पदां मदलीं १५८ पदां सर्वसामान्यां खातीर (यूआर) आसात. उरिल्लीं पदां एसटी ४२, एससी ४, ओबीसी ११३, इडब्लूएस ३५ अशीं राखीव आसात. तशेंच ३५२ पदां मदलीं १६ पदां दिव्यांगां खातीर, ७ पदां एक्स सर्वीसमेन जाल्यार ८ पदां खेळगड्यां राखीर राखीव आसात.
उमेदवारांची निवड सीबीटी परीक्षेंतल्या गुणां प्रमाण जातली. पयल्या आनी दुसर्या अशा दोनूय सीबीटी परीक्षांचो अभ्यासक्रमय जायराती सयत वेबसायटीचेर उपलब्ध आसा.
उच्च माध्यमिक परीक्षा पास (एचएसएससी) जावपा वांगडा डी. एड. वा बी. एड. (स म्हयन्यांचो ब्रीज कोर्स गरजेचो) पात्रताये सयत दोन वर्सां मुळावे शाळेंत शिकोवपाचो अणभव गरजेचो. तशेंच गोवा शिक्षक पात्रता चाचणी (जीटीईटी) पास जावपाचीय अट पात्रतेंत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
