भांगरभूंय | प्रतिनिधी
पणजी : चिंबलाचो ‘प्रशासन स्तंभ’ आनी ‘युनिटी मॉल’ ह्या प्रकल्पां आड सुरू आशिल्ल्या संघर्शान आतां खर रूप धारण केलां. सरकारा कडल्यान फकत प्रसिद्धीपत्रका वरवीं आस्वासन मेळिल्ल्यान तिडकल्ल्या गांवकारांनी आयज शुक्रारा पोरणें गोंयच्या गांधी चौकांत ‘महाआंदोलन’ केलें. ह्या वेळार कॉंग्रेसीचे प्रदेशाध्यक्ष अमित पाटकर, विरोधी पक्ष फुडारी युरी आलेमाव हांचे सयत खुबश्या फुडार्यांनी आंदोलकां कडेन संवाद सादून फाटबळ दाखयलें. पणजे लागू केल्लें कलम १६३ (जमावबंदी) आनी सरकाराच्या तांत्रिक त्रुटी आशिल्ल्या पत्रांक लागून हें आंदोलन आनीकूय खर जालें.
ह्या आंदोलनाची धार वाडिल्ल्याचें लक्षांत येतांच, प्रशासनान आझाद मैदानार जावपी आंदोलनाक आडावपा खातीर नागरीक सुरक्षा संहितेचें कलम १६३ लागू केल्लें. हाका लागून ग्रामस्थांक रणनीती बदलून आंदोलन पोरणें गोंयां करचें पडलें. सकाळीं १० वरां सावनच गांधी चौकांत ग्रामस्थांची गर्दी दिसून आयली. ‘आमची जमीन, आमचो हक्क’ अश्यो घोशणा तांणी दिल्यो. ह्या वेळार कसलीच वायट घडणूक घडची न्हय म्हणून पोरणें गोंय वाठारांत पुलिसांचो व्हड बंदोबस्त आशिल्लो.
गांवकारांनी आंदोलना वेळार हाजीर केल्लो सगल्यांत व्हड प्रस्न म्हळ्यार, सरकारी पत्राची वैधता. प्रशासन स्तंभ हो प्रकल्प सामान्य प्रशासन विभागाच्या अखत्यारेंत येता, जाल्यार युनिटी मॉल प्रकल्प हो पर्यटन खात्याच्या कार्यक्षेत्रांत येता. अशें आसतना पर्यटन संचालक केदार नायक हांणी प्रशासन स्तंभाच्या स्थलांतरणा विशीं पत्र कशें जारी केलें? असो प्रस्न चिंबल जैवविविधता वेवस्थापन समितीचे अध्यक्ष गोविंद शिरोडकार हांणी केलो. जो मेरेन संबंदीत खात्या कडल्यान अधिकृत आनी कायदेशीर नदरेन वैध आशिल्लें लेखी पत्र मेळना तो मेरेन सरकाराचेर विस्वास दवरपाक मेळचो ना. अशी ठाम भुमिका ग्रामस्थांनी घेतली.
आंदोलनाचे सुवातेर पाविल्ले विरोधी पक्ष फुडारी युरी आलेमावा हांणी सरकाराचेर खर टिका केली. थळाव्या लोकांच्या भावनांचो विचार करिनासतना हें सरकार प्रकल्प लादपाचो यत्न करता अशें तांणी सांगलें. चिंबलाची जैवविविधताय आनी थंयचो वोलो वाठार वाटावपा खातीर गांवचे लोक जे झगडटात ते पुराय गोंयच्या पर्यावरणाची राखण करपा खातीर झगडटा. कॉंग्रेस पक्षान आदल्या काळांत अशा लोकविरोधी प्रकल्पांक विरोध केला, आनी आतां सावन आमी गांवच्या लोकां वांगडा ठामपणान उबे आसात. ह्या सरकाराचें काम अनियोजीत आसा अशेंय अमित पाटकार हांणी सांगलें. हे प्रकल्प रद्द करचे बदला फकत स्थलांतराचें नाटक करून सरकारान वेळ मारपाचो यत्न केला असोय आरोप तांणी केला.
हें आंदोलन फकत दोन प्रकल्पां मेरेन मर्यादीत ना अशें गोविंद शिरोडकार हांणी स्पश्ट केलें. गोंयांतल्या अनियंत्रीत उदरगती आड आनी पर्यावरणाक उणाव हाडपी दरेक कृती आड ही एक सर्वांगीण चळवळ. पर्यटन खात्यान चिंबल जैवविविधताय समिती कडेन बरयल्ल्या पत्रांत हो प्रकल्प स्थलांतरीत करपाचें उतर दिलां, पूण अधिकृत अधिसुचोवणे वरवीं चिंबल तळें ‘ओलसाणीचो वाठार’ जाहीर जाय मेरेन धोको उरला. हे संबंदी ओलसाणीच्या वाठार प्राधिकरणान बेगोबेग कारवाय करची अशी मागणी गांवकारांनी केल्या.
सरकारान आंदोलनाचें चेंपण पळोवन नमती भुमिका जरी घेतली असली तरी, प्रशासकीय पांवड्यार जावपी चुकांक लागून ग्रामस्थां मदीं अविस्वासाचें वातावरण आसा. पर्यटन संचालकांचें पत्र हें फकत वेळ काडपाचें धोरण आशिल्ल्याची भावना आंदोलकां मदीं निर्माण जाल्या. पोरणें गोंयच्या गांधी चौकांत बशिल्ल्या ह्या ग्रामस्थांनी जाहीर केलां, जो मेरेन ठोस, लेखी आनी कायदेशीरपणान योग्य आशिल्ले ‘प्रकल्प रद्द’ जाल्ल्याचें पत्र तांच्या हातांत पडना तो मेरेन हें महाआंदोलन फाटीं घेवचे नात. सरकार हाचेर कितें तोडगो काडटा हाचे कडेन सगल्यांचें लक्ष लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
