भांगरभूंय | प्रतिनिधी
सरकारान १३५० कोटींचें लुकसाण जाल्ल्याचो दावो
पणजी : बांदकाम विभागाचे प्रधान मुख्य अभियंते (पीसीई) उत्तम पार्सेकार हांचे आड निविदा वांटपाक पक्षपातीपणा केल्ल्याचो आरोप करपी एक याचिका गोंयच्या मुंबय उच्च न्यायालयांत दाखल केल्या. हाका लागून राज्याचे तिजोरेंतल्या सुमार १३५० कोटी रुपयांचें लुकसाण जाल्ल्याचो दावो हे याचिकेत केला. ह्या प्रकरणाची खोलायेन चवकशी करपाचे निर्देश दक्षता विभागाक दिवचे अशी मागणी याचिकेंत केल्या.
बिरेस्तारा नागरिकांच्या एका गटान दाखल केल्ले याचिकेंत दावा केला, बांदकाम खात्यांतलीं निविदा काडिल्लीं आनी काडूंक नाशिल्लीं अशीं दोनूय कामां पार्सेकार हांच्या सोयर्यांक आनी कांय विशिश्ट कंत्राटदारांच्या गटाक दिलीं. गंभीर अनियमितताय आसूनय देयकां जारी केली, असेा दावोय याचिकेंत केला. अभियंतो पार्सेकार, दक्षता विभाग आनी हेर अधिकारिणीक प्रतिवादी केलें. मुकेश पटेल, लता देसाय हांचो याचिका दाखल करप्यां मदीं आसपाव आसा.
याचिकाकर्त्यांनी दक्षता विभागाचेर निश्क्रियतेचो आरोप केला. जानेवारी २०२५ त सविस्तर कागाळ दाखल करूनय खंयचीच योग्य चवकशी करूंक ना. याचिके प्रमाण, एकूच कारवाय म्हणून पार्सेकार हांकां मेमो दिवन स्पश्टीकरण मागयलें आनी उपरांत हें प्रकरण चिडिल्लें.
ह्या प्रकरणांत उच्च न्यायालयान बेगोबेग हस्तक्षेप करचो; अशी मागणी याचिकेंतल्यान केल्या आनी दक्षता विभागाक पार्सेकार हांचे आड निष्पक्ष चवकशी करपाचे निर्देश दिवपाची मागणी केल्या. हें प्रकरण सोमारा उच्च न्यायालयांत येवपाची शक्यताय आसा.
बांदकाम खात्याच्या सुमार १६ अभियंत्यांनी दाखल केल्ले दुसरे याचिके उपरांत ही याचिका दाखल केली. जातूंत पार्सेकार हांकां सेगीत तीन फावटीं सेवावाड दिवपाच्या सरकाराच्या निर्णयाला आव्हान दिलां. सेवावाढ दिल्ल्यान तांकां सेवानिवृत्ती उपरांत तांकां सुमार तीन वर्सां पदार रावपाक मेळ्ळें. अभियंत्यांनी सरकाराचेर अधिकाराचो गैरवापर केल्ल्याचो आरोप केला. ३१ जानेवारी २०२६ मेरेन दिल्ले नवे सेवावाढीक कसलेंच अपवादात्मक कारण नाशिल्ल्याचें म्हणलां. हे सेवा वाढीक लागून १४ ऑक्टोबर २०२५ च्या उच्च न्यायालयाचो निर्णय मोडिल्ल्याचें म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
