भांगरभूंय | प्रतिनिधी
मडगांव : येरादारी नेम पाळिनाशिल्ल्यांचेर तंत्रज्ञानाचो वापर करुन लक्ष दवरपाचेर भर दिला. कारवाय ही पुराव्यांचेर आदारून आसचे खातीर बांदकाम खात्याच्या सहकार्यांतल्यान राज्यांत एआय बेस ट्रॅफिक सिग्नल आनी कॅमेरे बसयतले. पयल्या टप्प्यांत ९२ सुवातांचेर ते बसयतले, अशी म्हायती येरादारी संचालक पी. प्रविमल अभिशेक हांणी दिली.
गोविंद रामनाथ कारे कायदो महाविद्यालयाच्या सहकार्यांतल्यान येरादारी खात्या वतीन राष्ट्रीय रस्ता सुरक्षा म्हयनो मनोवपा खातीर कार्यावळीचें आयोजन केल्लें. ह्या वेळार येरादारी संचालक पी. प्रविमल अभिषेक, कारे कायदो महाविद्यालयाचे प्रभारी प्राचार्य डॉ. मारिया गोरेटी सिमोईस, दक्षीण गोंय येरादारी अधीक्षक राजेंद्र प्रभुदेसाय, येरादारी खात्याचे राजेश नायक. भालचंद्र सावंत हाजीर आशिल्ले.
ह्या वेळार अभिशेक हांणी सांगलें : रस्तो सुरक्षा जनजागृती कार्यावळ दर वर्सा येरादारी संचालनालय, पुलीस आयोजीत करतात. रस्तो सुरक्षा नेम पाळप हें दरेकल्याचें कर्तव्य. गाडी चलयतना सीट बॅल्ट लावप, दुचाकी चलयतना हॅल्मेट घालप, वेगार नियंत्रण दवरप आनी वाहन चलयतना लेनाचे आनी हेर सगले नेम पाळप हें नागरिकांचें कर्तव्य. येरादारी सुरळीत जावपाक रस्त्यांची इंजिनिअरींग बरी आसपाक जाय. बांदकाम खात्या वतीन रस्तो ऑडिट करतात. ब्लॅक स्पॉटार गरजेची दुरुस्ती, स्पिडब्रेकर, तखटो उबारप अशे जायते उपाय करतात. तशेंच गाडयो चलोवपा खातीर योग्य आसा काय हाची तपासणी करतात. रस्तो सुरक्षा नेम पाळपा खातीर जागृताये सयत कारवाय करतात. मात, वाहन चालकांनी रस्तो सुरक्षा नेम कर्तव्य म्हूण पाळचे, अशें संचालक अभिशेक हांणी म्हणलें.
एआय बेस कॅमेर्याक लागून …
रस्तो सुरक्षा नेम मोडप्यांचेर कारवाय करपाक, शिस्त लागपाक येरादारी खातें मोहिमो राबयता. पुलीस घडणुकेच्या थळार नासले तरी एआय आदारीत ट्रॅफिक सिग्नल कॅमेर्यांक लागून वाहनांत बदल करपा सावन हेर रस्त्याचे नेम मोडपा मेरेन नदर दवरतले आनी नेम मोडपी लोकां आड कारवाय जातली.
२०० इलेक्ट्रीक बसींची मागणी
कदंब म्हामंडळ भौशीक येरादारी सेवा सुदारपा खातीर यत्न करीत आसा. कदम कॉर्पोरेशनान केंद्र सरकाराक सुमार २०० इलेक्ट्रीक गाडयां खातीर प्रस्ताव धाडला. केंद्र सरकाराच्या प्रतिसादाची वाट पळयतात अशें अभिषेक हांणी सांगलें.
रस्त्याचे नेम पाळी नाशिल्ल्यान अपघात
रस्त्याच्या अपघातां विशीं उपलब्ध आशिल्ले म्हायती प्रमाण राज्यांतले चडशे अपघात मनशाचे चुकीक लागून जातात. तातूंत रस्त्याचे सुरक्षेचे नेम पाळप ना, हेल्मेट घालप ना आनी हेर नेम मोडप हांचो आस्पाव जाता. येरादारी पुलीस आनी पुलिसांक रात दीस रस्त्यार उबे रावून कारवाय करपाक मेळना. देखून एआय आदारीत ट्रॅफिक सिग्नल कॅमेरे हो एक बरो पर्याय. पणजी स्मार्टसिटींतले कॅमेरे सध्या सुरू आसात, अशें येरादारी संचालकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
