भांगरभूंय | प्रतिनिधी
पणजी : गोंयच्या दर्यादेगांचेर बेवारशी सुण्यांचो फटको पर्यटक आनी पर्यटनाक बसता अशें निरीक्षण सर्वोच्च न्यायालयान नोंद केलां. गोंय आनी केरळ ह्या दोन राज्यांतल्या पर्यटनाचेर रस्ताद सुण्यांचो परिणाम जाता अशें न्यायालयान म्हणलां.
भौशीक सुवातांवेली रस्ताद सुण्यांची समस्या सोडोवपा विशीं आपले निर्देश पाळपा विशीं ‘अस्पश्ट’ प्रतिज्ञापत्रां दाखल केल्ले खातीर गोंयां सयत कांय राज्यां आनी केंद्रशासीत प्रदेशांचेर न्यायालयान खर शब्दांनी टिका केली. न्यायमूर्ती विक्रम नाथ, संदीप मेहता आनी एन. व्ही. अंजारिया हांच्या खंडपीठान दाखल करून घेतिल्ली स्वेच्छा याचिकेचेर सुनावणे मजगतीं सांगलें, हे समस्येची भौशीक सुरक्षा आनी अर्थीक नदरेन गंभीर परिणाम आसात.
नुस्त्याक लागून सुणीं दर्यादेगे कडेन आकर्शीत जातात. ताचो परिणाम पर्यटनाचेरूय जाता अशें न्यायमूर्ती मेहता हांणी सांगलें.
मजगतीं, पशुसंवर्धनमंत्री निळकंठ हळर्णकार हांणी विधानसभेंत सांगिल्लें, वाडपी समस्येचेर तोडगो काडपा खातीर २०२३ त रस्ताद सुणे वेवस्थापन धोरणांत सुधारणा केल्या. थळावे आनी पर्यटकांक राज्यांत सुणे चावपाच्यो जायत्यो घडणुको घडल्यात. जाका लागून पर्यटन वाठाराची बदनामी जाता. हें लक्षांत घेवन हें धोरण आनीक प्रभावी करपाक २०२३त तातूंत सुदारणा केली आनी तें सध्या लागू आसा, अशें मंत्री हळर्णकार हांणी स्पश्ट केल्लें.
मजगतीं, सर्वोच्च न्यायालयाचे वरिश्ठ वकील गौरव अग्रवाल हांणी खंडपीठाक सांगलें, दर्यादेगेवेल्यान धरिल्ल्या सुण्यांक त्याच वाठारांत परत सोडपाक मेळचे ना. तांणी गोंय आनी हेर राज्यां आनी केंद्रशासीत प्रदेशांनी सुण्यांचे समस्येचेर तोडगो काडपा खातीर उखलिल्ल्या पावलां विशींचो डेटाय न्यायालया मुखार सादर केलो.
न्यायालयान नमूद केलें, ताच्या आदल्या आदेशांक प्रतिसाद म्हणून दाखल केल्ल्या खुबश्या प्रतिज्ञापत्रांनी स्पश्टतायेचो उणाव आशिल्लो आनी प्रभावी पालनाचें प्रदर्शन करपाक ती अपेशी थारली.
ह्यान पयलीं १३ जानेवारीक सर्वोच्च न्यायालयान मुक्या जनावरां संबंदीचे नेम सुमार पांच वर्सां सावन लागू करूंक नाशिल्ल्याचें निरीक्षण नोंद करीत, सुणें चावपाच्या प्रकरणांत राज्यांक व्हड भरपाय दिवपाचे निर्देश दिवपाक शकतात अशें स्पश्ट केल्लें. रस्ताद सुण्यांच्या हल्ल्यांक लागून जावपी जखमो आनी मरणां खातीर राज्य अधिकारी आनी सुण्यांक खावपाक घालप्यांचेर जापसालदारी निश्चीत करपाक शकतात, अशे संकेतूय न्यायालयान दिल्ले.
गोंयांतूय सुणे चावपाचे घडणुके मदीं जाल्ली आनी वडपी चिंतेचे फाटभूंये न्यायालयाची ही टिप्पणी आयली. अधिकृत आंकडेवारी प्रमाण, फाटलीं तीन वर्सां प्रकरणां मदीं सेगीत वाड जाल्या. २०२५त हो आंकडो १९,००० घडणुकांच्या फुडें पावला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
