भांगरभूंय | प्रतिनिधी
मुंबय: महाराष्ट्राचे उपमुख्यमंत्री अजित पवार हांकां बुधवारा बारामती जाल्ल्या भिरांकूळ विमान अपघातांत मरण आयलें. बिरेस्तारा बारामतीच्या विद्या प्रतिश्ठानाच्या आंगणांत दुखेस्त वातावरणांत अजित पवार हांकां निमाणो निरोप दिलो. तांकां तांचे पूत पार्थ पवार आनी जय पवार हांणी मुखाग्नी दिली. तांच्या मरणा उपरांत राज्य सरकारान तीन दिसांचें शासकीय दुख्ख जाहीर केलें.
अजित पवार हांच्या अचकीत वचपांत फकत राजकीय न्हय, समाजीक आनी प्रशासकीय पांवड्यार व्हड पोकळी निर्माण जाल्या. निमाण्या संस्कारा उपरांत ह्या विमान अपघाताच्या तपासा विशीं म्हत्वाची म्हायती मुखार आयल्या. राज्य सरकारान हे घडणुकेची सीआयडी चवकशी करपाचे आदेश दिल्यात. हाचे वांगडाच बारामती पुलिसांक अपघात जालो थंय कोणाकूच प्रवेश दिवचो न्हय, अशी सुचवणी दिल्या. तपास प्रक्रियेंत कसलेच तरेचें आडमेळें येवचें न्हय म्हणून हो निर्णय घेतिल्ल्याचें सुत्रांनी सांगलां.
मजगतीं, फॉरेन्सिक पंगडान ह्यान पयलींच अपघाताचे सुवातेर वचून गरजेचे नमुने तपासणी खातीर एकठांय केल्यात. विमानाचे अवशेश, लाशिल्ल्या भागांचे नमुने आनी हेर तांत्रीक गजालींची तपासणी सुरू आसा. हो पुराय तपास बारामती पुलीस स्टेशनांत नोंद आशिल्ल्या ‘एक्सिडेंटल डेथ रिपोर्ट’चे फाटभूंयेर करतले. सीआयडी तपासांत फॉरेन्सिक अहवाल, एटीसी लॉग्स आनी मुळावी म्हायती हाचो खोलायेन अभ्यास करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
