भांगरभूंय | प्रतिनिधी
फाल्यां आझाद मैदानाचेर म्हाआंदोलन
पणजी : युनिटी मॉलाच्या सुवातेर जाल्ले बांदकाम तशेंच पत्रे काडून वाठार पयली सारखो करपाची मागणी आंदोलन करपी ग्रामस्थांनी केल्या. आंदोलनाविशीं आयज रातीं निर्णय जातलो मात फाल्यां शुक्रारा सकाळीं आझाद मैदानाचेर म्हाआंदोलन जातलेंच, अशी म्हायती चिंबल जैवविविधताय समितीचे अध्यक्ष गोविंद शिरोडकार हांणी दिली.
युनीटी मॉल आनी प्रशासन स्तंभ स्थलांतरीत करपाच्या निर्णया खातीर तांणी मुख्यमंत्री डॉ.प्रमोद सावंत हांचे उपकार मानले. दोनूय प्रकल्प दुसरेकडेन स्थलांतरीत करपाच्या निर्णयाक हांव येवकार दितां. मात प्रकल्प चिंबल तळ्याच्या प्रभाव वाठारात येना, हें ग्रामस्थांक मान्य ना. युनिटी मॉल तशेंच प्रशासन स्तंभ हे दोनूय प्रकल्प तळ्याच्या प्रभाव वाठारांत येता, अशें तांणी सांगलें. सर्वेक्षण अहवाल आनी डीपीआर घेवन आमी अभ्यास केलो तेन्ना आमकां ही गजाल दिसून आयली, अशें तांणी सांगलें.
युनिटी मॉल प्रकल्पा आड चिंबल ग्रामस्थांनी २८ डिसेंबर सावन आंदोलन सुरू केल्लें. बिरेस्तारा तांच्या आंदोलनाक ३३ दीस पुराय जाले. आंदोलन २८ डिसेंबराक सुरू जाले आसले तरी लडो सप्टेंबर २०२४ वर्सा सुरू जाल्लो. खासदार विरियातो फर्नांडीस, आमदार विरेश बोरकार हांचे सयत राज्याच्या बर्याच वाठारांतल्या लोकांनी आंदोलनाक तेंको दिलो. तांचे आंदोलकांनी उपकार मानल्या.
हे आंदोलनाक बर्याच लोकांनी तेंको दिलो. युनिटी मॉल, प्रशासन स्तंब दुसरीकडेन वरपाचो निर्णय जाला आसलो तरी चिंबलचे तळें वाटावपा सयत वाठार पयली सारखो करपाची आमची मागणी आसा. हाका लागून शुक्रारा म्हाआंदोलन जातलेंच, अशें ग्रामस्थांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
