भांगरभूंय | प्रतिनिधी
तिराना: अल्बानियान २०२५त संवसारांतली पयली आर्टिफिशियल इंटेलिजन्स (AI) मंत्री ’डिएला’ तयार केल्ली. हाचो हेतू देशांतलो भ्रश्टाचार उणो करप आशिल्लो. मात आतां एक व्हड वाद मुखार आयला, डिएलाक तयार करपी नॅशनल इन्फॉर्मेशन एजन्सीचे दोन मुखेल अधिकारी स्वताच भ्रश्टाचाराच्या आरोपांत आडकल्यात.
नॅशनल इन्फॉर्मेशन एजन्सीचे संचालक आनी उपसंचालकांक नजरकैदेंत दवरल्यात. तांचेर कंत्राटदारांक धमकावन कंत्राटांत फेरफार करप, हांयस दिवप आनी गुन्यांवकारी संघटणे कडेन संबंदीत आशिल्ल्याचो आरोप आसा. ही तीच एजन्सी आसा जी सरकाराची डिजिटल वेवस्था सांबाळटा. हे पुराय घडणुकेन सरकाराच्या भ्रश्टाचारा आड मोहिमेचेर प्रस्न निर्माण केला.
ह्या अधिकार्यांचेर आजूनय औपचारिकपणान कसलोच आरोप निश्चीत जावंक ना. प्रधानमंत्री ईदी रामा हांणी सांगलें, चवकशी पुराय जाय मेरेन ते कसलीच टिप्पणी करचे नात. अल्बानिया युरोपियन युनियनांत आसपावपाचो यत्न करता आनी हे खातीर व्हड भ्रश्टाचाराचेर नियंत्रण दवरप ही एक गरजेची अट.
भ्रष्टाचाराच्या आरोपा उपरांत प्रस्न निर्माण जाल्यात, एआयक कांय पुरावे लिपोवपा खातीर वा घोटाळो करपा खातीर डिएलाचो प्रोग्राम बदल्ला.
हांव मनीस न्हय, म्हाका कसलोच सुवार्थ ना
डिएला एक व्हर्च्युअल अवतार. जी पारंपरीक अल्बेनियाई कपड्यांनी दिसता. फाटल्या वर्सा पसून डिएला खुबश्या आंतरराष्ट्रीय परिशदेंत उलयलां आनी संवसारभर एआयक सरकारी कामांत वापरपाक उर्बा दिता. हांव मनीस न्हय, म्हाका कसलोच सुवार्थ ना, अशें तिणें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
