भांगरभूंय | प्रतिनिधी
न्युयॉर्क: अमेरिकेंतलें म्हत्वाचें राज्य टेक्सासांत नवे एच-१बी व्हिसा दिवपाचेर बंदी घाल्या. फुडल्या वर्सा मे म्हयन्या मेरेन नवे एच-१बी व्हिसा जारी करचे न्हय असो आदेश गव्हर्नर ग्रेग एबट हांणी दिला. पयल्या टप्प्यांत ही बंदी टेक्सासांतल्या सगळ्या सरकारी कार्यालयांक आनी विद्यापिठांक लागू जातली. ह्या आदेशाचो परिणाम सुमार १५ हजार भारतीयांक जावपाची शक्यताय आसा.
टेक्सास वर्कफोर्स कमिशनान सगळ्या एच-१बी व्हिसा धारकांचो आंकडो, नोकरी भुमिका, मूळ देश आनी व्हिसा कालबाह्य हांचे विशीं २७ मार्च मेरेन डेटा अहवाल मागला. नव्या आदेशा प्रमाण एच-१बी व्हिसाचो आरोप गैरवापर जावचो न्हय हे खातीर ही बंदी घाल्या.
एच-१बी जारी करपी अमेरिकेंतलें टेक्सास हें दुसरें व्हडलें राज्य. कॅलिफोर्निया पयल्या क्रमांकाचेर आसा. अमेरिकेंतल्या भारतीयांक दर वर्सा दिवपी सुमार दोन लाख एच-१बी व्हिसांतले सुमार ४० हजार व्हिसा टेक्सासांत दितात. तातूंतले सुमार २५ हजार आयटी कंपनींक आनी उरिल्ले १५ हजार सरकारी कार्यालयांक आनी विद्यापिठांक दितात. ऑस्टिन विद्यापिठांत व्हड प्रमाणांत भारतीय लोक काम करतात.
ऍमेझॉनान १६ हजार कर्मचार्यांक काडून उडयले, ३ म्हयन्यांत दुसरी व्हडली कपात: दुसरे वटेन तंत्रगिन्यान कंपनी ऍमेझॉन कंपनीन संवसारभरांतल्या आपल्या कार्यालयांतल्यान १६ हजार कर्मचार्यांक काडून उडयल्यात. फाटल्या तीन म्हयन्यांत ही दुसरी व्हडली कपात. ताणें ऑक्टोबरांत १४ हजार कर्मचार्यांक काडून उडयल्ले. ऍमेझॉन वेब सर्विसेस, रिटेल, प्राइम व्हिडियो आनी एचआर विभागांतल्यान ही कापणी केल्या अशें ऍमेझॉनाचे सीईओ अँडी जेसी सांगतात. सुत्रांनी दिल्ले म्हायती प्रमाण आतां ऍमेझॉन आपले कार्यावळींत आर्टिफिशियल इंटेलिजन्स (एआय) साधनांचो चडांत चड आस्पाव करपाक लागलां. हाका लागून नोकर्यां मदीं कपात करपाक लागल्यात. नोकर्यांचो आंकडो कोरोना पयलींच्या पांवड्यार पावोवपाची तयारी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
