दादा

भांगरभूंय | प्रतिनिधी

अजीतदादा हे बेधडक उलोवपी, विचार करपी, धाडसी आशिल्ले. निर्णय जालो काय….

महाराष्ट्राचे उपमुख्यमंत्री अजीत पवार काल विमान अपघातांत गेले. राजकी मळाक बशिल्लो हो धपको. कारण ते राष्ट्रवादीचे मुखेली. मूळ पक्षांतल्यान फुटिल्लो एक गट तांणी येसस्वी सांबाळिल्लो. राजकारणांत आयज नांव घेवपा सारकीं कांय नांवां आसात, तातूंत अजीतदादाचें नांव घेवचेंच पडटलें. राजकारणांतले ते दादाच आशिल्ले. मरण आयिल्ल्यां विशीं वायट उलोवपाक जायना, असो एक संकेत आसा. मात सोशल मिडियाचेर काल दीसभर तांचे विशीं दुख्ख, मोग व्यक्त जालो, तितलीच खर टिकाय जाल्ली वाचूंक मेळ्ळीं. भ्रश्टाचाराच्या आरोपांचो उल्लेख जालो, तांच्या कार्याचे गुणय बऱ्याच जाणांनी गायले. तें कितेंय आसलें तरी अजीतदादा हे धाडसी, स्वताच्या विचारांक दसून राविल्ले, अभ्यासू फुडारी आशिल्ले, हें विरोधकूय मान्य करतात.
अजीतदादांचे बापूय गेले तेन्ना आवयच्या सांगण्या वयल्यान तांणी शिक्षण सोडून शेती वेवसायांत लक्ष घालें. काका शरद पवाराक लागून ते राजकारणांत पावले. 1982 त पिरायेच्या 23 व्या वर्सा ते सहकारी साकर कारखान्याचेर वेंचून आयले. उपरांत 1991 त बारामती लोकसभा मतदारसंघांत. पूण, नरसिंहराव सरकारांत संरक्षण मंत्री आशिल्ल्या शरद पवारां खातीर तांणी जागो सोडलो. काकाच्या जाग्यार आमदार जाले, ते फाटलीं 35 वर्सां तिगले. 10 जून 1999 क विदेशी मुळाचो फुडारी नाका म्हूण सोनिया गांधीक विरोध करून शरद पवार, पी ए संगमा आनी तारीक अन्वर हांणी राष्ट्रवादी काँग्रेस पार्टी काडली. तेन्नाच्यान अजीतदादा तातूंत आशिल्ले. हालीं तांणी सत्ते खातीर ती फोडली. भ्रश्टाचाराच्यो फायली मुखार करून तांचेर चेपण हाडिल्लें म्हूण ते फुटले, असो दावा कांय जाणकार करताले. मात इडी, न्यायालयान उपरांत तांकां भ्रश्टाचाराच्या आरोपांतल्यान निर्दोश मुक्त केले. आतां राष्ट्रवादीचे दोन गट लागीं येवपाच्यो हालचाली करतना अजीतदादा मात पयस गेले. तांची घरकान्न वा पूत पक्षाचीं सुत्रां हातांत घेतात, काय तो शरद पवार गटांत विलीन जाता, तें पळोवपाचें. सरकारांत नवो उपमुख्यमंत्री कोण जाता, ताचे कडेनूय सगल्याचें लक्ष आसतलें.
अजीतदादा हे बेधडक उलोवपी, धाडसी. निर्णय घेतलो काय कशेच फाटीं सरपी न्हय. घरचो पक्ष फोडून ते सकाळफुडें उपमुख्यमंत्री पदाचो सोपूत घेवपाक गेल्ले, आतांय तांणी काकाक निवृत्त जावपाचो सल्लो दिवन सगल्यो वेंचणुको एकहाती म्हणटात तश्यो जिखिल्ल्यो. अजीतदादा पुरोगामी विचारांचे. पक्षांतलेच फुडारी जातीचें उक्तेपणी राजकारण करतना, तांणी स्वता एकदांय जातीचो वापर राजकारणा खातीर केलो ना. फुले, शाहू, आंबेडकर विचारसरणीचें जाहीर समर्थन केलें. विज्ञानवादी विचार मांडले. अशें वागप कितलें धाडसी वा फोंडांत घालपी तें राजकारणाचो अभ्यास आशिल्ल्यांक सांगपाक नाका! सकाळीं स जावचे पयलीं उठून खात्याच्या कामाक सुरवात करपी ते एकसुरे फुडारी आसतले. सहकार, शेती, शिंपणावळीचो बारीकसाणेन अभ्यास आशिल्लो तांचे सारको लोकप्रतिनिधी सहसा मेळचो ना. मिश्कील उलोवपी अजीतदादा जायते फावटी भलतेंच उलोवन गेल्यात, वादग्रस्त थारून टिकेचे धनीय जाल्यात. कामां मात शिस्तींत करपी. अधिकारीय तांकां भियेवन आसताले. खर प्रशासक आनी कामाचेर विस्वास आशिल्लो हो आमदार. शेतकारांच्या प्रस्नांचेर ते आक्रमक जाताले, कांय वेळार तांचे कडेन दोन हातूय करताले. भावनिकते परस तांचे भोवतेक निर्णय वेव्हारीक.
वयर म्हणलां ते प्रमाण, सोशल मिडियाचेर तांच्या मरणा उपरांत खर प्रतिक्रिया व्यक्त जाल्यात. पयशे आनी सत्ते फाटल्यान धांवपी फुडारी, सामान्य मनशांकूय तांचे उदाहरण दिवन जायत्या जाणांनी उपदेशाचे डोस दिल्यात. ते दिवपाचो हो वेळ न्हय, हाचेंय धंग तांकां उरूंक ना. अजीतदादा विशीं मत- मतांतरां आसतलींच, पूण तांच्या वचपान महाराष्ट्राच्या राजकारणाक एक वेगळें मोडण मेळटलें, हातूंत मात दुबाव ना.