भांगरभूंय | प्रतिनिधी
शेन वॉटसन, मार्टीन गप्टील, रॉबीन उथप्पा, अमीत मिश्रा हांची ‘प्रुडन्ट’ चर्चा
भांगरभूंय | प्रतिनिधी
पणजी : टी-20 वर्ल्ड कप 7 फेब्रुवारी सावन सुरू जाता. ते फाटभुंयेर देशांत वर्ल्ड कप फिव्हर चालू आसा. भारत आड न्युझिलॅण्ड माळेन भारतीयांक भिवपाची गरज ना म्हूण संकेत दिला. हे वटेन गोंयांत लिझॅण्ड्स टी-20 क्रिकेट सुरू आसा. ह्या सर्तींत एका परस एक आदले क्रिकेट धुरंधर वांटेकार जाल्यात. तातुंतलेंच चवगजाण प्रुडन्ट मीडियाच्या सुपर एक्स्लुझिव्ह टी-20 वर्ल्डकप रावंड टेबलांत वांटेकार जाल्लें. तांणी आपल्या दूरदृश्टीन, अणभवी उलोवपांतल्यान वर्ल्डकप कसो आसतलो हाची झलक दाखयलीं. शेन वॉटसन, मार्टीन गप्टील, रॉबीन उथप्पा आनी अमीत मिश्रा हांच्या वांगडा प्रुडन्ट मीडियाचे संपादक संचालक प्रमोद आचार्य हांची क्रिकेटीचेर ‘प्रुडन्ट’ चर्चा जबरदस्त रंगली.
भारताची तयारी बरी जाल्या. सर्ती आदीं कितें खेळ्ळां ताका म्हत्व ना, सर्तींत कशें खेळटा. पंगडांत चड बदल करपाची गरज ना. वर्ल्ड कपांत स्थीर पंगड दिसपाक शकता, अशें रॉबीन उथप्पान म्हणलें. आयपीएलाक लागून संवसारभरांतल्या खेळगड्यांक भारतीय हवामान वळखीचें जालां. मात, वर्ल्ड कपांतलो ताण वेगळोच आसता, अशेंय ताणें म्हणलें.
वर्ल्ड कपा आदीं खुबश्यो चांचण्यो जाल्यो. तरी पंगडाची तयारी बरी आसा, योग्य दिकेन आसा. जे पद्दतीन आमचो पंगड मुखार वतां तें पळोवन धादोशी जाता, अशें अमीत मिश्रान सांगलें.
प्रमोद आचार्य हांणी वर्क लोड विशीं अमीत मिश्राक विचारलें, तेन्ना ताणें ही बरी गजाल म्हूण जाप दिली. हाका लागून आमचें फास्ट बॉलर घटमूट उरतां. तशेंच कांय तरणाट्या बॉलरांकूय संद मेळटा. आमच्या वेळार नाशिल्लें, आतां आसां, बरें आसा, अशेंय ताणें म्हणलें.
मार्टीन गप्टीलान वर्ल्ड कपा खातीर न्युझिलॅण्ड एक घटमूट पंगड आसा, अशें सांगलें. खेळगडे म्हूण खेळाचेर दिवचें, भायर ज्यो गजाली चलतात ताचे कडेन लक्ष दिवपाक जायना, असो सल्लो तांणी वांटेकार खेळगड्यांक दिलो.
तरणाट्या खेळगड्यांनी परिस्थिती प्रमाण खेळचें, असो शेन वॉटसनान सल्लो दिलो.
सेमी फायनलींत खंयचें 4 पंगड आसतले असो प्रस्न विचारलो तेन्ना गप्टिल आनी रॉबीन उथप्पान दक्षीण आफ्रिका, भारत, ऑस्ट्रेलिया आनी न्युझिलॅण्ड म्हूण सांगलें. अमीत मिश्रानूय तेंच आसतलें म्हूण सांगलें. जाल्यार शेन वॉटसनान शब्दान सांगिनासतना हेंच 4 पंगड आसतले म्हूण हांसून संकेत दिलें.
बॉक्स
क्रिकेटींत राजकारण नाका : वॉटसन
जेन्ना राष्ट्रीय राजकारण क्रिकेटांत ढवळाढवळ करता तेन्ना निराशा जाता. म्हाका खेळगड्यांची काकुळट येता. भारतांत जावपी टी-20 विश्वचषकांत खेळपाची संद मेळप ही एक खाशेली संद आसता. क्रिकेटींत राजकारण येवप हें दुर्दैव आसा, अशें ऑस्ट्रेलियेचो आदलो क्रिकेट खेळगडो शेन वॉटसन हांणी बांगलादेश क्रिकेट संकश्टा विशीं उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
