भांगरभूंय | प्रतिनिधी
नवी दिल्ली: १८व्या लोकसभेचें अर्थसंकल्पीय अधिवेशन बुधवार सावन सुरू जातलें. जें २ एप्रील मेरेन चलतलें. हें अर्थसंकल्पीय अधिवेशन दोन भागांत आसतलें. हाचो पयलो भाग २८ जानेवारी ते १३ फेब्रुवारी मेरेन आनी दुसरो भाग ९ मार्च ते २ एप्रील मेरेन आसतलें. ह्या काळांत वट्ट ३० बसका जातल्यो. २८ जानेवारी आनी १ फेब्रुवारीक शुन्य काळ आसचो ना.
अधिवेशनाचो पयलो भाग आयच्यान लोकसभा आनी राज्यसभेचे जोड बसकेंत राष्ट्रपती द्रौपदी मुर्मू हांच्या अभिभाशणान सुरू जातलें. ह्या सत्रांत आभार प्रस्तावाचेर चर्चा आनी केंद्रीय अर्थसंकल्पाचे चर्चेचेर लक्ष केंद्रित करतले. लोकसभेंत राष्ट्रपतींच्या अभिभाशणाचेर धन्यवाद प्रस्तावाचेर चर्चे खातीर तात्पुरते तीन दीस (२ ते ४ फेब्रुवारी) जनश्चीत केलां.
संसदेच्या अर्थसंकल्पीय अधिवेशनाक बोवाळ जावपाची शक्यताय आसा. विरोधी पक्षान फाटल्या दोन अधिवेशनांत (पावस आनी शिंयाळ्या) मतदार वळेरेच्या स्पेशल इंटेंसिव्ह रिव्हिजनचेर (SIR) चर्चा आनी मनरेगा (MGNREGA) येवजणे सुवातेर आशिल्ल्या VB-G RAM G कायद्याक विरोध करीत बोवाळ केल्लो.
सुत्रां प्रमाण, विरोधी पक्ष ह्या अधिवेशनांतूय SIR, VB-G RAM G कायद्या सयत भारताचेर अमेरिकेन लादिल्ले शुल्क, परराष्ट्र धोरण, वायुप्रदूशणाचो मुद्दो, अर्थवेवस्था,नेण्ट्या भुरग्यां खातीर सोशल मीडियाचेर बंदी अश्या मुद्यांचेर चर्चा करपाची मागणी जातली.
अर्थसंकल्पीय अधिवेशनांत ह्या विधेयकांचेर चर्चा जावपाची शक्यताय
लोकसभेंत ९ विधेयकां प्रलंबीत आसात, जातूंत विकसीत भारत शिक्षण अधिश्ठान विधेयक २०२५, प्रतिभूती बाजार संहिता २०२५ आनी संविधान (१२९ वी सुधारणा) विधेयक २०२४ हाचो आसपाव आसा. ह्या विधेयकांची सध्या संसदीय स्थायी वा प्रवर समित्यांकडल्यान तपासणी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
