भांगरभूंय | प्रतिनिधी
युनिटी मॉला आड 30 तारखेर म्हाआंदोलन
पणजी : चिंबल तळें आनी प्रस्तावीत मॉलाच्या वाठाराचें सर्वेक्षण अहवाल पुराय जाले उपरांतूच आंदोलक आनी मुख्यमंत्री हांचे मजगतीं चर्चा जातली. हाका लागून चर्चा केन्ना जातली, ताची वेळ आतांच सांगप कठीण आसा. मजगतीं, युनिटी मॉल विरोधांतल्या ग्रामस्थांचें आंदोलन चालूच आशिल्ल्यान ३० जानेवारीक म्हाआंदोलन जातलें अशी म्हायती अजय खोलकार हांणी दिली.
बसकेंत थारिल्ले प्रमाण चिंबल तळें आनी प्रस्तावीत युनिटी मॉल जमनीचें शेनवारा सर्वेक्षण सुरू जाल्लें. तें काम आजूनय पुराय जावंक ना. उपरांत ताचो अहवाल तज्ज्ञ तयार करतले. हो अहवाल मुख्यमंत्र्यांक सादर करतले. ताचे उपरांतूच आंदोलक आनी मुख्यमंत्री हांचे मदीं चर्चा जातली अशी म्हायती चिंबल ग्रामस्थांची बाजू मांडपी वकील मेलीसा सिमोईस हांणी दिली. ताचे पयलीं चर्चा करपांत कसलोच अर्थ ना अशें तांणी म्हणलें.
युनिटी मॉल प्रकल्पा आड चिंबल ग्रामस्थांनी २८ डिसेंबर सावन साखळी उपोशण आंदोलन सुरू केल्लें. फाल्यां आंदोलनाक एक म्हयनो पुराय जातलो. प्रजासत्ताक दिसाचे कार्यावळींत निदर्शनां करपाच्या हेतान चिंबल ग्रामस्थ सोमारा विद्यापीठ मैदानार चलत येतले. पुलिसांनी आडायिल्ल्यान तांकां विद्यापीठ मैदानार प्रवेश करपाक मेळूंक ना. सर्वेक्षण पुराय जाले उपरांत आंदोलकांच्या शिश्टमंडळाकडेन युनिटी मॉल प्रकल्पा विशीं चर्चा करतले. आंदोलकांनी शांत रावचें, असो उलो मारून मुख्यमंत्र्यांनी परत चर्चेचा प्रस्ताव दिला.हाका लागून मुख्यमंत्री आनी आंदोलकां मदीं परत चर्चा जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
