भांगरभूंय | प्रतिनिधी
पणजी : गोंयां सयत भारतांतल्या भौशीक मळार बँकांनी पांच दिवसांचो कामाचो आठवडो बेगोबेग लागू करपाचे मागणे खातीर बँक कर्मचारी संघटणांनी देशव्यापी संप आपयला. हाचो फटको गोंयां सयत भारतांतल्या भौशीक मळावेल्या बँकांच्या कामाचेर बसला. म्हणून बँकेचें काम विस्कळीत जालां. गोंयचीं पर्यटन थळां आदीं जाहीर केल्ले प्रमाण देशभरच्या भौशीक मळावेले बँकांचे कर्मचारी मंगळार, २७ जानेवारीक संपार गेल्यात. ह्यान पयलीं युनायटेड फोरम ऑफ बँक युनियन्स (युएफबीयु) हे बँक कर्मचार्यांचे संघटणेन देशव्यापी संपाची घोशणा केल्ली. सप्तकभर फकत पांच दीस काम ही पद्धत बेगोबेग लागू करची, बँक कर्मचार्यांची मुखेल मागणी आशिल्ल्यान, ते खातीर तांणी हो संप आपयला. ह्या संपाक लागून सरकारी बँकांतलो रोख वेव्हार, चेन क्लिअरन्स, शाखांतले सदचें कामकाज ठप्प आसा. विशेश म्हळ्यार जानेवारी म्हयनयांत पयलींच चवथो शेनवार (२३ जानेवारी), आयतार (२५ जानेवारी), प्रजासत्ताक दीस (२६ जानेवारी) ह्या सेगीत सुटयांक लागून बँको बंद आशिल्ल्यो. हाका लागून मंगळारा संप आपयिल्ल्यान बँक बंद उरपाचो आयचो चवथो दीस. मात खासगी बँको युएफबीयुच्या भाग नाशिल्ल्याचो संपाचो परिणाम ह्या बँकांचेर ना.
बँक कर्मचारी आनी सरकार हांचे मदल्या वादाचें मुखेल कारण म्हळ्यार शेनवारची सुटी. बँक कर्मचारी संघटणा फाटल्या कितल्याशाच वर्सां सावन ‘५-डे वर्क वीक’ लागू करपाची मागणी करतात. मार्च २०२४त इंडियन बँक्स असोसिएशन आनी बँक युनियन्स हांचे मदीं जाल्ल्या १२व्या द्विपक्षीय करारांत सगले शेनवार सुटी दिवपाचेर सहमती जाल्ली.
मात, ह्या करारा उपरांतूय सरकारा कडल्यान अजूनय अधिकृत अधिसुचवणी (नोटिफिकेशन) जारी करूंक ना. हाका लागून कर्मचार्यां मदीं खर तिडक आसा. युनियन्सच्या म्हणण्या प्रमाण, ही मागणी खंयचेच अतिरेकी नाशिल्ल्यान संतुलीत कामकाजा खातीर आसा. हाका लागून कर्मचारी सदांच ४० मिनटां अतिरिक्त काम करपाकूय तयार आसा.
सध्या बँका म्हयन्यांतलो दुसरो आनी चोवथो शेनवार ह्या दिसा बंद आसतात. आतां सगले शेनवार सुटी जाहीर करपी अधिसुचवणी सरकारान बेगोबेग करची, अशी ठाम मागणी युनियन्स करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
