भांगरभूंय | प्रतिनिधी
पणजी : राष्ट्रीयकृत बँकेच्या कर्मचार्यांक दरेका शेनवारा सुटी दिवन कामाचो काळ सप्तकांतल्या ५ दीस करचो अशी मागणी युनाइटेड फोरम ऑफ बँक युनियनाचे वतीन केली. हे खातीर मंगळारा विवीध राष्ट्रीयकृत बँक कर्मचार्यांनी एक दिसाचो संप केलो. तशेंच आझाद मैदानार आंदोलन केलें. आंदोलनांत राज्यभरांतल्या राष्ट्रीयकृत बँकांच्या ४५० परस चड फांट्यांतल्या कर्मचार्यांनी वाटो घेतिल्लो.
हे विशीं संघटनेचे मॅक्स परेरा हांणी सांगलें, संपांत ४ अधिकारी जाल्यार ५ हेर कर्मचारी संघटणांनी वाटो घेतला. देशभरांत करपी संपाचो हो एक भाग. केंद्र आनी राज्य सरकारचीं खातीं, एलआयसी तशेंच भौशीक मळावेल्या हेर उपक्रमांक दरेका शेनवारा सुटी दितात. मात राष्ट्रीयकृत बँकांच्या कर्मचार्यांक म्हयन्यांतल्या दुसर्या आनी चोवथ्या शेनवारा काम करचें पडटा. सुटी दिवपा विशीं आमच्या संघटणांनी वळेरी केंद्र सरकारा वांगडा उलोवन करपाक जाय.
ह्यान पयलीं आमी आमची मागणी भारतीय बँकिंग संघटणे वतीन (आयबीए) केंद्र सरकारा मेरेन पावयल्या. उपरांत अधिकारी आनी कामगार संघटणांची आयबीएचें उलोवप जाल्लें. मार्च २०२४ त आमकां दरेका शेनवारा सुटी दिवपाचें आस्वासन दिले. मात ताचे उपरांत दोन वर्सां जालीं तरी ताची अंमलबजावणी जावंक ना. हे विशीं आमी विवीध केंद्रीय खात्यां कडेन फाटपुरवण करतात. आमची मागणी बेगोबग पुराय करची म्हूण आमी आयज देशव्यापी संप केला.
चाळीस मिनटां चड काम करपाक तयार
परेरा हांणी सांगलें, आमी जरी दरेका शेनवारा सुटी मागतात तरी ताचे बदला दिसाक ४० मिनटां चड काम करपाची आमची तयारी आसा. हे विशीं आमी लेखी स्वरूपांत आयबीएक कळयलां. आमी गिरायकांची गैरवेवस्था करपा खातीर न्हय, आमच्या अधिकारां खातीर वावुरतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
