भांगरभूंय | प्रतिनिधी
मडगाव : कुडटरे लायटीचो खांबो बसयतना जाल्ले घडणुकेंत एका कामगाराक मरण आयलें. ह्या प्रकरणांत मायणा-कुडटरच्या पुलिसांनी सुपरवायझराचेर गुन्यांव नोंद केला. ही घडणूक २३ जानेवारीक दनपरां सुमार ३.३० वरांचेर घोगळ-कुडटरे घडली.
चड म्हायती प्रमाण, ‘मेसर्स श्री गुरुकृपा एजन्सी’ हे संस्थेचे सायट सुपरवायझर देवराज एस. (रा. रायतळ- कुडतरी, मूळ रा. शिमोगा -कर्नाटक) हांणी रस्त्या कुशीक सिमेंटाचो लायटीचो खांबो बसयतना जतनाय घेवंक ना.
ह्या निश्काळजीपणाक लागून तो सिमेंटाचो खांबो थंय काम करपी गौरव कुमार (मूळ रा. भागलपूर- बिहार) ह्या कामगाराच्या पांयार पडलो. ह्या अपघातांत गौरव कुमार गंभीर जखमी जाल्लो. ताका रोखडोच बांबोळेच्या गोमेकॉंत दाखल केलो. ह्या प्रकरणांत पुलिसांनी दुबावीत देवराज एस. हांचे आड निश्काळजीपणाक लागून कामगाराक मरण आयिल्ल्याचो गुन्यांव नोंद केलो.
ह्या प्रकरणाचो फुडलो तपास उपनिरीक्षक संकेत नायक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
