अनुवादकांक बरे दीस

भांगरभूंय | प्रतिनिधी

पे डणेंच्या आंबिये म्हाविद्यालयांत हालींच म्हजो करियराचेर संवाद जालो. हो विशय म्हाका स्वताक खूब आवडटा. कोंकणी भाशेंत आयज वेगान, ज्युस्त अनुवाद करप्यांची गरज आसा. कोंकणी संसदेच्या ग्रंथालयांत पावल्या. कोंकणी पेपर पावला. पेपरांक, टिव्ही, वेबसायटींक अनुवादक लागतात. आॅनलायन अनुवाद हेर भाशांनी लागीं लागीं तश्याक तसो जाता, पूण कोंकणींत तो अजून ज्युस्ताक ज्युस्त जायना. हेर भाशांचे तुळेन कोंकणी आॅनलायन मजकूर उणो आशिल्ल्यान हें घडटा जावंये. करियर म्हूण अनुवादक पदाक खूब वालोर आसा.
गोंयांतल्या खांडोळा काॅलेजींत पदवी केल्ल्या उमेदवाराक अनुवादक म्हूण डिप्लोमा करपाक मेळटा. ही म्हायती म्हाका विद्यार्थ्यांक दिवपाक मेळ्ळी. ज्येश्ठ पत्रकार संदेश प्रभुदेसाय हांणी हालींच कोंकणी भाशेंत उणीच हजारभर पदां आसात. करियर करप्याक सोदपी तरणाट्यांची ती वाट पळयतात, अशें सांगलां. खंयचीय भाशा आयकून, वाचून, बरोवन बरे तरेन शिकपाक मेळटा. आधुनिक तंत्रज्ञानाक लागून आदले परस सगल्योच गजाली सोंप्यो जाल्यात. साबार तरांचेर शब्दकोश तुमचे लागीं आसपाक जाय. राजहंस जो कोंकणी शब्दकोश काडटा, तो भाशा शिकणाऱ्यांनी म्हारग आसलो तरी घेवपाक जाय. सगल्या शिक्षणीक संस्थांनी तो घेवपाक जाय.
आंबिये म्हाविद्यालयांत कोंकणीच्यो साबार कार्यावळी जातात. कोंकणी विभागाची मुखेली बाय प्रियांका परब, संपदा केरकार, दीपा रायकार ह्यो कोंकणी कार्यावळी आयोजीत करीत आसतात. इतलेंच न्हय, तर त्यो येशस्वीय थारतात. तांकां प्राचार्य जुआंव काॅस्ता हांचें प्रोत्साहन मेळटा. ते मार्गदर्शनूच करतात.
हांवें वयर म्हणलां ते प्रमाण कोंकणींत जाय तें करियर करपाक मेळटा. शिक्षणा सारकें थारावीक मळ सोडलें जाल्यार हेर कडेन कोंकणी उमेदवारांक खूब व्हडली संद आसा. जाय ती व्याकरणशुद्ध भाशा बरोवपाची कळाशी. सध्या गोंयांत कोंकणी दिसाळें, नेमाळीं येतात, तीं विकत घेवन वाचपाक जाय. कारण विकत घेतिल्लें दिसाळें संदर्भ म्हूण कांय दीस तरी सांबाळून दवरूंक मेळटा. कितें वाचपाचें तर दर्जेदार बरोवपी आसात तांचे लेख, अग्रलेख, बातम्यो बी. दिसाळें बारीकसाणेन वाचून तातूंतलो वेंचिक मजकूर मतींत दवरल्यार ताचो सामान्यज्ञान वाडपाक फायदो जाता.
मोबायलाचो वायट परिणाम
आमचे कडेन वगोत ना, अशें सगलेच सांगतात. पूण ही फट न्हय मूं? हालींच एका दोतोरान सांगलें, मोबायल फोनाक लागून आमची भलायकी इबाडटा. आमी व्हडले घास घेतले काय पोट भरिल्ले सारकें दिसता. पूण हाका लागून भलायकेच्यो साबार समस्या निर्माण जातात. एसिडीटी, कुपोशण…. आमी व्हड घास घेतात, पूण ताचे वांगडा हवाय गिळटात. हाका कारण मोबायल फोन. मोबायलाक लागून भलायकेचें नेमकें कितें जाता तें तुमच्या वळखीच्या दोतोराक विचारात. हालींच आयिल्ल्या अहवाला प्रमाण मोबायलाक लागून विद्यार्थी आत्महत्या लेगीत करतात. हें जावचे पयलीं आमी सादूर जावया. विद्यार्थी घरा आसतना ते पालकांक काॅपी करतात. तेन्ना पालकांक तें समजावन सांगपाक जाय. कांय दादले, बायलो 24 वरां मोबायलाक दसून आसतात. पालक- शिक्षक समितीन आपले बसकेंत मोबायल फोनाचे वायट परिणाम सांगपाक जाय. बसकेक खंय चडशे पालक गैरहाजीर आसतात. तें खरें आसूं येता. तांचे खातीर झूम मिट दवरपाक जाय. जर बसका रेकाॅर्ड केल्ली आसा जाल्यार पालक ती वेळ मेळटकच आयकूंक शकता. पालक बदलना जाल्यार मिटींग घेवप्यांनी तरी बदलूंक जाय, असो वेळ आतां आयला.
प्रत्येक शिक्षका कडेन पालकांचो नंबर आसता. तांणी फोन करून पालकांक मार्गदर्शन करपाक जाय. मात्सो शिक्षकांक त्रास पडटलो. पूण शाळांनी मोबायल फोनाच्या वेसना बाबतींत आतां उपाय करपाक जाय, अशें म्हाका दिसता. आयच्या काळांत आहार खूब म्हत्वाचो. भुरग्यांनी परिक्षेच्या दिसांनी मेळत तें खावपाक जायना. खास करून मसाल्याचें, तेलकट, भायलें खाण. पालकांनी भुरग्यांक वेळ दिवपाक जाय. मोबायल फोन हो अभ्यासांत अडचण जावंक लागली जाल्यार सगलेंच इबाडटलें. परिक्षेंत गूण मेळचे नात. भलायकी पेड्डेर जातली. पालकांनी स्वता सुदारल्यार भुरगीं सुदारतलीं. पालकांनी ह्या विशयां वयल्या कार्यशाळांक हाजेरी लावपाक जाय. तंत्रगिन्यान बदलता तशें आमीय बदलूंक जाय. वता वतां सांगचें म्हणल्यार जांकां संगीताची रुच आसा तांणी गंधर्व परिक्षेचो अर्ज भरलाच आसतलो. सगल्यांक परिक्षेचीं परबीं.