भांगरभूंय | प्रतिनिधी
पणजी : गोंयांत दोन हजार परस चड लाडली लक्ष्मीचे लाव आडकून उरल्यात. हातूंतले 38 टक्के अर्ज निधी नाशिल्ल्यान पडून आलात. जाल्यार हेर अर्ज कागदपत्रांचे प्रक्रियेक लागून आडकल्यात. निधी आयले उपरांत येवजणेचे एक लाख रुपया तांकां मेळटले, अशी म्हायती बायलां आनी भुरगीं उदरगत खात्यान दिल्या.
खात्यान जारी केल्ले आंकडेवारी प्रमाण लग्न जाल्ल्या धुवांनी लाडली लक्ष्मीचे पयशे मेळोवपा खातीर केल्ले 2254 अर्ज फाटलीं तीन वर्सां जाली आडकून उरल्यात. तातूंतले 869 अर्ज निधी नाशिल्ल्यान आडखळ्ळ्यात.
लग्न जाले उपरांत लग्न दाखलो, 25 वर्सांचो राबितो दाखलो आनी हेर गरजेचीं कागदपत्रां तांणी बायलां आनी भुरगीं कल्याण खात्याक धाडल्यात, पूण अजूनय हे अर्ज मंजुरेची वाट पळयतात. निधी मंजूर जाले उपरांत ह्या अर्जांक रोखडीच मंजुरी मेळटली, अशें खात्यान सांगलां.
1385 अर्ज अपूर्ण आसात. तातूंतलीं कांय बायलां गोंया भायर जल्माक आयल्यात, शिक्षणीक पात्रताय अर्ज दाखल करूंक ना, 25 वर्सांचो राबितो दाखलो दिवंक ना, एफीडेव्हीट अर्जा वांगडा जोडूंक ना, बँक तपशील धड नात, आवय- बापयाचो जल्म दाखलो जोडूंक ना, आधार कार्ड जोडूंक ना अश्या कागदपत्रांच्या उणावा खातीर हे अर्ज आडकून उरल्यात. गरजेचीं सगलीं कागदरपत्रां दाखल केले उपरांत ह्या अर्जाक मान्यताय मेळटली. जाल्यार आडकून पडिल्ल्या 1385 अर्जा मदले 248 अर्जदार बायलां आनी 11 अर्जदार बायलांच्यो आवयो गोंया भायर जल्माक आयिल्ल्याचें नदरेक आयलां. मजगती, फाटल्या तीन वर्सांत 6036 बायलांच्या खात्यांत लाडली लक्ष्मीचो एक लाख रुपया जमा जाला. ज्या चलयांनी 18 वर्सां जातकत येवजणेक अर्ज केल्ले तांचो चडसो आस्पाव ह्या लाभार्थ्यां मदीं आसा. पयलीं 18 वर्सां जाले उपरांत अर्ज करपाक मेकळीक आशिल्ली आनी तेन्नाच एक लाख रुपया लाभार्थ्याच्या खात्यांत जमा जाताले आनी लग्नाचो दाखलो जोडले उपरांत खात्यांत आशिल्ले एक लाख रुपया जुरा सयत मेळटाले. पूण आतां प्रक्रिया बदलल्ल्या. आतां लग्न जाले उपरांतूच अर्ज करपाक मेळटा आनी लग्नाचो दाखलो मेळटकच एक लाख रुपया फावो जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
