भांगरभूंय | प्रतिनिधी
पणजी : गोंयांत पतंजली योग पिठाचें नवें केंद्र सुरू करचे खातीर यत्न चालू आसात. हे विशीं गोंय सरकारा कडेन सेगीत उलोवणी चालू आसा. बेगिनूच आमी गोयांत भलायकेचें संवसारीक केंद्र करतले. आमची संस्था गोंयच्या मूळ सनातन संस्कृतीक वांगडा घेवनूच समृद्धी कडेन वचले, अशे योगगुरू बाबा रामदेव हांणी सांगलें.
शेनवारा आंतरराष्ट्रीय आयुर्वेदीक आनी वेलनेस संमेलना खाला आयोजीत केल्ले कार्यावळींत बाबा रामदेव उलयताले. ताचे आदीं तांणी योगसेतूचेर योगासनांची प्रात्यक्षिका घेतलीं.
बाबा रामदेव हांणी सांगलें, गोंय म्हणले उपरांत लोकांच्या दोळ्या मुखार सोबीत दर्यादेगो, सैम, न्हंयो येतात. मात त्याच वेळार कॅसिनो, सोरो, नाच अश्यो गजाली लेगीत येतात. ह्यो गजाली गोंयची मूळ संस्कृती न्हय. गोंयची प्रतिमा सोबीत सैम आनी संवसारीक भलायकी केंद्र अशी जावपाक जाय. संवसारभरांतले लोक आपले भलायके खातीर हांगा येवपाक जाय. बदलते जिणेशैलीक लागून दुयेंसां, ताण तणाव वाडटा. लोक आपली भलायकी बरी दवरचे खातीर यत्न करतात. अश्या वेळार गोंयांत भलायकी आनी स्वास्थ केंद्र उबारलें जाल्यार ताचो फायदो राज्याक जातलो.
पतंजली भलायकी केंद्रा कडेन आयुर्वेद आनी हेर भारतीय उपचार पद्दती विशींचें शास्त्रीय पुरावे आसात. प्रत्यक्ष टीव्ही आनी हेर माध्यमांतल्यान आमी 100 कोटीं परस अदीक लोकां मेरेन पावल्यात. आमकां खात्री आसा, लोकांक हांगा पुराय भलायकेचो अणभव घेवपाक मेळटलो. सध्या गोंयांत केंद्र सुरू करपा संबंदांत आमचे वांगडी आराखडो तयार करतात. स्वस्थ, भंयमुक्त राष्ट्रा खातीर मानसीक, शारिरीक, अध्यात्मीक भलायकी बरी आसप गरजेचें आसा. ते खातीर पतंजली सगली ती मजत करपाक तयार आसा, अशें बाबा रामदेव हांणी सांगलें.
‘फकत घोशणा नाकात’
लोकांनी फक्त सनातन धर्मांतल्या तत्वाच्या फक्त घोशणा दिवच्यो न्हय. सनातन धर्म, संस्कृती योग, आयुर्वेद हांकां आपले जिणेचो एक भाग करपाक जाय. अशें केलें जाल्यारूच आमी दुयेंसां आनी वायटपणां हांचे पसून मुक्त जावपाक शकतले, अशें बाबा रामदेव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
