भांगरभूंय | प्रतिनिधी
पणजीः निवृत्त सरकारी कर्मचाऱ्यांक गोंय सरकारान बरी खबर दिल्या. 1 जानेवारी 2006 वा ताचे उपरांत 30 जून वा 31 डिसेंबर दिसा निवृत्त जाल्ल्या वा निवृत्त जावपी पात्र कर्मचाऱ्यांक नोशनल पगार वाड दिवपाचो निर्णय घेतला. ह्या आदाराचेर अशा कर्मचाऱ्यांक वाडिल्लें निवृत्ती वेतन मेळटलें. केंद्रीय कार्मिक खात्यान जारी केल्ल्या परिपत्रका उपरांत राज्य सरकारान हो निर्णय घेतला.
हे संबंदी अर्थ खात्यान जारी केल्ल्या परिपत्रका प्रमाण, राज्य सरकाराच्या सेवेंतल्यान अनुक्रमान 30 जून आनी 31 डिसेंबराक सेवानिवृत्त जाल्ल्या कर्मचाऱ्यांक निवृत्ती वेतनाचो फायदो दिवपा खातीर 1 जुलय आनी 1 जानेवारीक काल्पनीक पगार वाड दितले. हाचेर आदारीत वाडिल्ल्या निवृत्तीवेतनाचो प्रत्यक्ष अर्थीक फायदो 1 जानेवारी 2006 उपरांत आनी 30 एप्रिल 2023 पयलीं सेवानिवृत्त जाल्ल्या सगळ्या पात्र कर्मचाऱ्यांक 1 मे 2023 सावन लागू जातलो.
निवृत्ती वेतना संबंदी कर्मचाऱ्यांच्या फायद्या खातीर न्यायालयीन निर्णय आसल्यार अशा प्रकरणांत न्यायालयाचे विशिश्ट निर्देश लागू जातले. वाडिल्ले निवृत्ती वेतन मेळोवपा खातीर कर्मचाऱ्यांनी 20 मे 2025 दिसा कार्मिक खात्यान जारी केल्ल्या परिपत्रका प्रमाण सगळ्यो अटी पुराय करप गरजेचे आसा. सर्वोच्च न्यायालयाच्या आदेशा प्रमाण काल्पनीक वेतन वाड फकत निवृत्ती वेतनाची गणना करपाच्या हेतान लक्षांत घेतले. ग्रेच्युटी आनी हेर पेन्शन संबंदीत फायद्याच्या गणने खातीर ताचो विचार जावचो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
