भांगरभूंय | प्रतिनिधी
भांगरभूंय । प्रतिनिधी
पणजीः राज्यांत दोन हजार परस चड लाडली लक्ष्मीचें लाव आडखून उरल्यांत. हातूंतले 38 टक्के अर्ज निधी नाशिल्ले कारणान आडकून उरल्यांत जाल्यार हेर अर्ज हे कागदपत्रांचे प्रक्रियेक लागून आडखळ्यांत. निधी आयले उपरांत येवजणेचे एक लाख तांकां मेळटले, अशी म्हायती बायल आनी भुरगीं उदरगत खात्यान दिल्या.
खात्यान जारी केल्लें आकडेवारी प्रणाण, लग्न जाल्ल्या धुवांनी लाडली लक्ष्मीचे पयशे मेळोवपा खातीर केल्ले 2254 अर्ज फाटलीं तीन वर्सा जाली आडखून उरलां.
तातूंतले 869 अर्ज निधी नाशिल्ले कारणान आडखळ्ळा. लग्न जाले उपरांत लग्न दाखलो, 25 वर्सांचो राबितो दाखलो आनी हेर गरजेची कागदपत्रां तांचेनी बायल आनी भुरगीं कल्याण खात्यांक धाडल्या. पूण अजूनय हे अर्ज मंजूरेची वाट पळयता. एकदा निधी मंजूर जालो काय ह्या अर्जांक रोखडीच मंजूरी मेळटली, अशें खात्यान सांगलां.
जाल्यार 1385 अर्ज हे अपुरे आसात. तातूंतली काय बायलां गोंया भायर जल्माक आयल्यांत, शिक्षणीक पात्रताय अर्ज दाखल करूंक ना, 25 वर्साचो राबीतो दाखलो दिवंक ना, एफीडेव्हीट अर्जा वांगडा जोडूंक ना, बँक तपशील धड नात, आवय-बापयाच्यो जल्म दाखलो जोडूंक ना, आधार कार्ड जोडूंक ना अशा कागदपत्रांच्या उणावा खातीर हे अर्ज आडखून उरल्यांत. गरजेची सगळी कागदरपत्रां दाखल केले उपरांत ह्या अर्जांक मान्यताय मेळटली.
जाल्यार आडखून उरिल्ले 1385 अर्जा मदली 248 अर्जदार बायलां आनी 11 अर्जदार बायलांची आवयो ही गोंया भायर जल्माक आयिल्ल्याचे नदरेक आयलां.
मजगतीं, फाटले तीन वर्सांत 6036 चलयांच्या खात्यांत लाडली लक्ष्मीचो एक लाख रुपया जमा जाला. ज्या चलयांनी 18 वर्सा जातकत येवजणेक अर्ज केल्ले तांचो चडसो आस्पाव ह्या लावार्थ्या मदीं आसा. पयलीं 18 वर्सा जाले उपरांत अर्ज करपाक मेकळीक मेळटाली आनी तेन्नाच एक लाख रुपया लावार्थ्यांच्या खात्यांत जमा जाताले आनी लग्नाचो दाखलो जोडले उपरांत खात्यांत आशिल्ले एक लाख रुपया जुरा सयत मेळटाले. पूण आता प्रक्रिया बदल्ल्या. आतां लग्न जाले उपरांतच अर्ज करपाक मेळटा आनी लग्नाचो दाखलो मेळटकत एक लाख रुपया फावो जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
