भांगरभूंय | प्रतिनिधी
पणजीः चिंबला तळ्याचें सर्वेक्षण तीन दीस चलपाची शक्यताय आसा. सद्या तज्ञ पंगडान चिंबल तळ्याची शीम आंखपाक सुरवात केल्या आनी उपरांत बफर झोन, सैमिक झरे आनी कुशीच्या सर्व्हे क्रमाकांत आशिल्ले सुवातींचें आंखप जातलें. तज्ञ हो अहवाल तयार करून सुचोवण्यो आनी आक्षेपा खातीर थळाव्यां मुखार दवरतलें.
मुख्यमंत्री डॉ. प्रमोद सावंत आनी चिंबल गांवकार हांचे मदीं बुधवारा जाल्ले बसकेंत चिंबल तळ्याचो प्रभावीत वाठार (झोन ऑफ इन्फ्लूएंस) निश्चीत करपा सयत युनीटी मॉला मेरेनच्या जाग्याचें सर्वेक्षण करपाचेर एकमत जाल्लें. बसकेंत थारिल्लें प्रमाण अधिकारी शुक्रारा सर्वेक्षण करपाक आयिल्ले. अधिकार्यांनी फकत सर्व्हे नंबर ४०/१ चें सर्वेक्षण करपाक सुरवात केल्या आनी तळ्याचो मुखेल भाग (हायस्ट पॉयंट) हो दुसर्या सर्व्हेंत येता म्हूण थळाव्यांनी वाद घालो. उपरांत शेनवारा सकाळीं ह्या तळ्याचे नव्यान सर्वेक्षण सुरू जालें.
ह्या वेळार पर्यटन सल्लागार प्रमोद बदामी, गोंय जैवविधताय मंडळाचे अध्यक्ष डॉ. प्रदीप सरमोकादम, एनआयओचे तज्ञ अधिकारी आनी थळाव्यांचे हाजेरींत सर्वेक्षणाक सुरवात जाली.
सद्या तळ्याच्यो शिमो आंखप चालू जालां. उपरांत तळ्याच्यो झरी, उदकाच्या स्रोतांची आंखणी जातली. उपरांत कुशीच्या सर्वेक्षण क्रमाकांत आशिल्ल्यो 5 ते 6 सुवाती, साताना- तळावलीचो वाठार, युनिटी मॉलाच्या सुवातीची आंखणी जातली. हे प्रक्रियेक तीन दीस लागपाची शक्यताय आसा. दर दिसा अधिकारी सर्वेक्षणाचे अपडेट थळाव्यांक दितले आनी थळावे हाचो नियाळ घेवन कितें त्रुटी आसात जाल्यार त्यो सुदरावपाक सांगतले.
युनिटी मॉलाक विरोध कायमः खोलकार
हे सर्वेक्षण युनिटी मॉला खातीर न्हय तर पाणथळाचे प्रभावीत वाठार आनी शिमो आखपा खातीर करता. युनीटी मॉल प्रभावीत वाठारांतल्यान भायर येता जाल्यार प्रकल्प येतलो हें सरकार सांगता तशें आमी थळावे करपाक दिवचें नात. हें पाणथळ तिगून उरचें आनी फाल्यां युनीटी मॉल प्रकल्प रद्द जावन हे सारके आनीक दुसरे प्रकल्प येवचे न्हय म्हूण हें सर्वेक्षण आसा, अशें थळावे अजय खोलकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
