गोंयांतल्यान वचपी 400 कोटींचो कंटेनर चोर्ला घांटांतल्यान गायब

भांगरभूंय | प्रतिनिधी

नाशिक: गोंयांतल्यान कर्नाटकांतल्या एका देवळा खातीर व्हरतात अशें नाटक करुन पोरण्या दोन हजार रुपयांच्या नोटांनी भरिल्लो सुमार 400 कोटी रुपयांचो कंटेनर गायब जाल्ल्याचो दुबाव आसा. ह्या दुबावाक लागून नाशिकांतल्या एका तरणाट्याचें अपहरण, मारपेट आनी जिवे मारपाची धमकी दिल्याचो गंभीर प्रकार उक्तडार आयलां.
नाशिक जिल्ह्यांतल्या इगतपुरी तालुक्यांत रावपी संदीप पाटील हाणें नाशिक ग्रामीण पुलीस स्टेशनांत दाखल केल्ले कागाळी प्रमाण, कर्नाटकांतल्या चोर्ला घांट वाठारांतल्यान हो कंटेनर चोरयेक गेल्ल्याचो आरोप ताचेर केला. ह्या आरोपाचेर आदारून ताचें अपहरण करून ताका अनवळखी सुवातेर व्हेलो. थंय ताका क्रूरपणान बडयलो आनी तशेंच ताका आनी ताच्या कुटुंबाक जिवे मारपाची धमकी दिली असोय आरोप ताणें केलो.

गोंय कडेन संबंद, प्रकरणाक वेगळेच वळण
ह्या प्रकरणांतली सगळ्यांत म्हत्वाची आनी धक्को दिवपी गजाल म्हणल्यार ही कथित रोख रक्कम गोंय राज्यांतल्यान धाडल्या असो दावो आसा. गोंयच्यान कर्नाटकांत देवळा खातीर पयशे व्हरतात असो देखावो करून ही रक्कम प्रत्यक्षांत गायब केल्ल्याचो दुबाव तपास यंत्रणांनी उक्तायला. देखून हे प्रकरणा फकत महाराष्ट्रा पुरते मर्यादीत ना. गोंय, कर्नाटक आनी गुजरात राज्यांनी ते पावला.
संदीप पाटील हाणें ह्या प्रकरणांत कांय वेवसायीक आनी वरिश्ठ पुलीस अधिकारी आसात असो धक्को दिवपी दावो केला कागाळींत केलां. तशेंच ही सगली रक्कम मुंबय-ठाणे वाठारांतल्या एका बांदकाम वेवसायिकाची आसा अशेंय तांणी सांगलां.
पांच जाणांक अटक, एसआयटीची स्थापना
ह्या प्रकरणाची चवकशी करतना नाशिक ग्रामीण पुलिसांनी जयेश कदम, विशाल नायडू, सुनील धुमाळ, विराट गांधी आनी जनार्दन धायगुडे (मुंबय) ह्या पांच जाणांक अटक केल्या. दोन आरोपी अजूनय फरारी आसात. प्रकरणाची गंभीरताय मतींत घेवन निष्पक्ष आनी पुराय तपास करपा खातीर खाशेलो तपास पंगड (एसआयटी) स्थापन केला अशी म्हायती नाशिक ग्रामिणाचे अतिरिक्त पुलीस अधीक्षक आदित्य मिरखेलकार हांणी दिली.
सुमार देड ते दोन म्हयने आदीं ही घडणूक घडिल्ली अशें कळटा. जशी जशी चवकशी फुडें वता तशी तशी मुखेल राजकी आनी अर्थीक कनेक्शन उक्तें जातले अशी शक्यताय आसा. ह्या कथित रोख प्रकरणांक लागून देशभरांत बोवाळ निर्माण जावपाची लक्षणां दिसतात.