भांगरभूंय | प्रतिनिधी
नवी दिल्ली, खबरां संस्था ः संवसारांतल्या अर्द्या लोकांक म्हणल्यार सुमार 4 अब्ज लोकांक उदकाची समस्या आसा अशें संयुक्त राश्ट्रांच्या नव्या अहवालांत म्हणलां. संवसारांतल्या 100 व्हड शारां मदल्या अर्द्या शारांनी उदकाचो खर उणाव आसा अशेंय ह्या अहवालांत सांगला. हातूंत दिल्ली, बीजिंग, न्यूयॉर्क, रिओ ह्या सारक्या व्हड शारांचो आस्पाव आसा. अहवाला प्रमाण 39 शारांनी ही परिस्थिती चड गंभीर आसा.
ह्या अहवालांत दिल्लीचो क्रमांक चवथो आसा. कोलकाता णवें सुवातेर, मुंबय बारावें, बेंगळुरू चोवीस आनी चेन्नय एकोणीसवें क्रमांकाचेर आसा. ते भायर हैदराबाद, अहमदाबाद, सूरत आनी पुण्यांतूय बऱ्याच काळासावन उदकाचो उणाव आसा.
अहवाला प्रमाण, न्हंयो आनी तळीं सुकपाक लागल्यात, भूंयगत उदकाची पातळी देंवता आनी ओलसाणीची जमनी सुकपाक लागल्या. दर वर्सा सुमार 4 अब्ज लोकांक उण्यांत उणें एक म्हयनो उदकाचो उणाव येता.
तळीं, हिमन्हंयो आनी भूंयगत उदकांत उणाव
संवसारांतल्या अर्द्या व्हड तळ्यांतलें उदक 1990 सावन उणे जालां. भूंयगत उदकाचो सांठो 70% मेरेन सेगीत उणो जाला. फाटल्या 50 वर्सांत युरोपांतले बरेचशे ओलसाणीचे वाठार ना जाल्यात. 1970 सावन हिमन्हंयांचो आकार सुमार 30% उणो जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
