भांगरभूंय | प्रतिनिधी
कानपूरः उत्तर प्रदेशांतल्या कानपूर शारांत मध्यान रातीं पुलिसांनी धाड घालून कलेक्टरगंज वाठारांतल्या धनकुट्टी वाठारांतल्या एका घरांतल्यान 2 कोटी रुपयांची रोख रक्कम आनी 62 किल रुपें जप्त केला. ही रक्कम आंतरराष्ट्रीय सट्टेबाजी आनी हवाला वेव्हारा कडेन संबंदीत आसा अशी म्हायती पुलिसांक मेळ्ळे उपरांत ही कारवाय केल्या.
बिरेस्तारा रातच्या सुमार णव वरांचेर स्पेशल टास्क फोर्स आनी थळाव्या पुलिसांनी रमाकांत गुप्ता हांच्या घराचेर धाड घाली. घराच्या सगळ्या वटांनी पुलीस तैनात करुन पुलीस भितर सरले तेन्ना तांकां व्हड प्रमाणांत रोख रक्कम आनी रुपें मेळ्ळें. दुबावितां कडल्यान समाधानकारक जाप मेळूंक नाशिल्ल्यान पुलिसांनी सगळे सामान जप्त केले. कार्टनांत भरून दवरिल्ली रोख रक्कम पुलिसांक मेळ्ळी.
ह्या प्रकरणांत पुलिसांनी राहुल जैन (किदवय नगर), शिवम त्रिपाठी, सचिन गुप्ता (यशोदा नगर-गंगागंज), वंशराज आनी एकल्याक अटक केली. प्राथमीक म्हायती प्रमाण, हें पांचूय आरोपी इश्ट आसून ते एकठांय बेकायदेशीर वेवसाय चलयताले. चवकशे वेळार दिल्ली, अलीगढ, वाराणासी, इंदोर, मुंबय, नोएडा आनी जयपुरांतल्या कांय जाणांचीं नांवां उजवाडाक आयल्यात आनी ह्या हवाला आनी सट्टेबाजीचे नेटवर्क देशभरांत पातळ्ळ्यात असो दुबाव पुलिसांनी उक्तायला. सध्या दुबावितांची पुराय चवकशी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
