भांगरभूंय | प्रतिनिधी
नवी दिल्ली, खबरां संस्थाः लक्झरी घडयाळ निर्मातो जेकब अँड कंपनीन 21 जानेवारीक आपले नवे घडयाळ ‘ओपेरा वनतारा ग्रीन कॅमो’ लाँच केलें. हें घडयाळ गुजरातांतल्या अनंत अंबानीच्या वन्यजीव बचाव आनी संवर्धन प्रकल्प वनताराक दिल्ली मानवंदना आसा.
घडयाळीच्या डायलाचेर अनंत अंबानीची ल्हान प्रतिकृती (मिनिएचर) आसा. तशेंच शींव आनी बंगाल वाग हांचीं ल्हान आकृती आसात. घडयाळींत ग्रीन कॅमो मोटिफ सयत 21.98 कॅरेटाचे 397 मोलादीक स्टोन्स आसात.
ह्या घडयाळीचें सगळ्यांत व्हडलें खाशेलपण म्हळ्यार ताची डायल, जी थिएटर सारकी दिसता. मीडियाच्या खबरां प्रमाण तातूंत भांगरान तयार केल्लो एक हती आनी ‘वनतरा’ हें नांवूय आसा.
घडयाळ पाचव्या आनी धव्या हिऱ्यांनी सजयल्या
घडयाळ रानां सारकी दिसपा खातीर पाचव्या रंगाचो कॅमोफ्लाज मोटिफ वापरला. हातूंत पाचव्या रंगाच्या चकचकीतपणाक लागून डिमेंटोयड गार्नेट, सॅव्होरायट्स आनी पाचवे नीलम हांचे वांगडा धवे हिऱ्याचो वापर केला.
म्युझिकल आनी रोटेटिंग यंत्रांचो आस्पाव
हे घडयाळ जेकब अँड कंपनीच्या फामाद ‘ओपेरा’ संग्रहाचो एक भाग आसा. तातूंत म्युझिक बॉक्स मेकॅनिझम आसा जे बटण दामल्यार संगीत वाजयता. जेन्ना संगीत वाजता तेन्ना घडयाळीची पुराय डायल (पायलट, शींव आनी वाग आकृती सयत) घुंवपाक लागता.
‘वनतारा’ कितें?
ज्या प्रकल्पांतल्यान प्रेरणा घेवन ही घडयाळ तयार केल्या तो जामनगर (गुजरात) हांगाच्या रिलायन्साच्या रिफायनरी कॉम्प्लेक्सांत 3,500 एकरांनी पातळिल्लें व्हडलें वन्यजीव पुनर्वसन केंद्र. मार्च 2025 वर्सा प्रधानमंत्री नरेंद्र मोदी हांणी ताचें उक्तावण केल्लें. हांगा 1.5 लाखां परस चड जनावरां रावतात. तशेंच हतयां खातीर हांगा खाशेलें हॉस्पिटल आनी एमआरआय, सीटी स्कॅन सारकिल्ल्यो आधुनीक सुविधा आशिल्लें 1 लाख चौखण फूटांचे रानवटी जनावरांचें हॉस्पिटल आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
