भांगरभूंय | प्रतिनिधी
सिरियल किलराचो दावो फटीचो
दुबाविताचो दिशाभूल करपाचो यत्न
दुबाविताच्या संपर्कांतल्या बायलांची पडटाळणी
भांगरभूंय । प्रतिनिधी
म्हापशें : उत्तर गोंयांतल्या हरमल आनी मोरजी ह्या नामनेच्या दर्यादेग वाठारांनी दोन रशियन बायलांचो गळो चिरून निर्दयपणान खून केल्लो. सुरवातीक रशियन नागरीक दुबावीत आलेक्सी लिओनोव (37) हाणें आपणें 15 परस चड बायलांक मोक्ष दिल्ल्याचो दावो केल्लो. दुबावितान सांगिल्ल्या बायलांची गोंय, हिमाचल आनी दिल्ली पुलिसांचे पडटाळणेंत तातूंतलीं चडशीं बायलां जिवीत आसात. हाका लागून दुबाविताचो खूब जाणांक जिवेशी मारिल्ल्याचो दावो फटीचो थारता. मजगतीं, मदलोवाडो, मोरजे खून जाल्ली एलिना वानिवा (37. रशियन) हिचे कुडीचो शुक्रारा पोस्टमार्टम केलो.
बिरेस्तारा 15 जानेवारीक हरमल- बामणभाटी वाठारांत एलिना कास्तानोव्हा ह्या 37 वर्सां पिरायेचे रशियन बायलेचो गळो चिरून खून केल्लो. ह्या प्रकरणांत मांद्रें पुलिसांनी दुबावीत आलेक्सी लिओनोव (37. मूळ रशिया) हाका अटक केल्ली. ते उपरांत शुक्रारा 16 जानेवारीक मदलोवाडो मोरजे बिराडाचे कुडींत एलिना वानिवा हे आनीक एके रशियन बायलेची कूड सांपडिल्ली. तिचोय धारेच्या हत्त्यारान गळे चिरून खून केल्लो. हो दुसरो खून लेगीत दुबावीत आलेक्सी हाणेंच केल्ल्याचें पुलीस चवकशेंत कळिल्लें.
अटक केले उपरांत दुबावितान पुलिशेक म्हायती दितना खूबश्या बायलांक आपणें मोक्ष दिल्ल्याचें म्हणल्यारूच खून केल्ल्याचें सांगिल्लें. ते भायर 14 जानेवारीक बालखाजन कोरगांवां रावताली त्या बिराडांत मेल्ले स्थितींत सांपडिल्ली मृदुस्मिता सायकिया (40. रा. आसाम) हे बायलेचो खून लेगीत आपणेच केल्ल्याचो दावो ताणें पुलिसां मुखार केल्लो. मृतुस्मिता हिका चड प्रमाणांत घुंवळे वखदां घेतिल्ल्यान मरण आयिल्ल्याचो दुबाव उक्तावन पुलिसांनी हें असैमीक मरण म्हूण प्रकरण नोंद केल्लें. ते भायर तिचो पोस्टमार्टमा उपरांत व्हिसेरा तपासणे खातीर प्रयोगशाळेंत धाडला.
सुरवातीकूच दुबावीत रशियन नागरिकान पुलिसांक दिल्ले म्हायती प्रमाण गोंय पुलिसांनी तपास करून दिल्ली आनी हिमाचल प्रदेश पुलिसांक लेगीत सतर्क करून दुबाविता कडल्यान मेळिल्ल्या नांवांच्या बायलांची पडटाळणी करपाची सुचोवणी केल्ली. कारण दुबावितान हिमाचल प्रदेश आनी दिल्लींत लेगीत बायलांक जिवेशी मारून मोक्ष दिल्ल्याचें म्हणिल्लें.
मजगतीं, अटकेच्या दोन दिसां उपरांत दुबावितान पुलिसांची दिशाभूल करपाचो यत्न चलयला. दुबाविताचे इत्से प्रमाण पुलीस आलोक्सीक खाणा जेवणाचो भूस दितात, मात हें घुंवळे वखदां घेतले उपरांत तो खंयच्याच प्रस्नाची जाप दिना. पुलिसांनी गरजे भायल्यो गजाली विचारल्यार मात दुबावीत ताका भरभरून प्रतिसाद दिता. मात खुना कडेन संबंदीत प्रस्नाचेर तो मोनो जाता, हे खातीर पुलीस तपास आडखळ्ळा. एकूण दुबावितान त्या दोनूय बायलांची निर्दयपणान हत्या कित्याक केली, हो लेगीत गूट अजून सुटूंक ना. मात मांद्रें पुलीस दुबावितान तोंड उक्तें करचे हे खातीर विवीध युक्ती वापरतात. मजगतीं, रशियन दुतावासाचे मान्यताये उपरांत एलिना वानिवा हिचे कुडीचेर सुक्रारा जीएमसींत पोस्टमार्टम केलो. तिचो गळो चिरून खून जाल्ल्याचें अहवालांत म्हणलां.
घुंवळे वखदाचे नशेंत रचिल्ली मोक्षाची काणी ?
मरण आयिल्ली मृदुस्मिता सायकीया सोडून दुबावितान सांगिल्ल्या नांवांच्यो बायलो जिवीत आशिल्ल्याचें मांद्रें आनी गोंय पुलिसांक तपासणे उपरांत कळ्ळें. तशेंच हिमाचल प्रदेश आनी दिल्ली पुलिसांक लेगीत कांय बायलां जिवीत सांपडल्यात. जाल्यार बायलांचो सोद दिल्ली आनी हिमाचल प्रदेश पुलीस घेतात. ताका लागून सद्यस्थितींत दुबावीत आलेक्सीन दिल्ली म्हायती ही चुकीची थारल्या. दुबावीत हो घडणुके दिसा घुंवळे वखदांचे नशेंत आशिल्लो आनी तातूंतल्यानूच ताणें ही मोक्षाची काणी रचली आसतली, अशी शक्यताय पुलीस अधिकाऱ्यांनी उक्तायल्या. पूण दुबावितान नांवां सांगिल्लीं सगलीं बायलां जिवीत सांपडनात, ते मेरेन खंयच्याय निमाण्या निश्कर्शा मेरेन पावचे न्हय, अशी सुचोवणी वरिश्ठ अधिकाऱ्यांनी पुलिसांक दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
