भांगरभूंय | प्रतिनिधी
पणजी : पुलीस खात्यांत फाटल्या 25 वर्सां परस अदीक काळा सावन शेंकड्यांनी कनिश्ठ पुलीस कर्मचारी बडटेची वाट पळयतात. मात अशें आसून लेगीत पुलीस खात्यांत 2022 त कार्यवाहक (ऑफिशिएटींग) उपअधिक्षकपदार बडटी दिल्ल्यां मदल्या 19 अधिकाऱ्यांक तीन वर्सां उपरांत पुलीस अधिक्षक पदाचेर बडटी दिल्या. ताका लागून पुलीस खात्यांत कनिश्ठ कर्मचाऱ्यां मदीं खर नाराजी पातळ्ळ्या.
पुलीस खात्यांत फाटल्या 25 वर्सां परस चड काळ सेवेंत रुजू जाल्ले सुमार 250 पुलीस कॉन्स्टेबल अजून बडटेची वाट पळयतात. ह्या कर्मचाऱ्यांक अजून लेगीत एका पदाचेर बडटी जावंक ना. मात 2026 त भारतीय राखीव दळांत (आयआरबी) कॉन्स्टेबल पदाचेर भरती जाल्ल्यांक पुलीस उपनिरिक्षकपदाचेर बडटी मेळ्ळ्या . ते भायर हेर सरकारी खात्यांतल्या कर्मचाऱ्यांक वयल्या काळांत उण्यांत उणे तीन पदांचेर बडटी मेळटा, पूण पुलीस खात्यांतले खूबशे कर्मचारी फाटल्या 25 वर्सां सावन पयल्या पदाचेर बडटी मेळपाची वाट पळयतात.
हेर खात्यांतल्या पदाचेर बडटे खातीर इत्सूक कर्मचारी नासल्यार वा गरजेच्या सेवा कालावधीची अट सदळ करून बडट्यो दितात. अशे तरेची वेवस्था करून फाटल्या 25 वर्सां परस अदीक काळ एकाच पदाचेर सेवा दिवपी पुलीस कॉन्स्टेबलांक बडटी दिवची, अशें खूबशे कर्मचारी खाजगेंत उलयतात. तशेंच कांय कर्मचाऱ्यांनी बडटे खातीर पुलीस म्हासंचालक तशेंच सरकारा कडेन गाराणें घातलां. हाचेरूय कसलोच उपाय येनाशिल्ल्यान कांय कर्मचाऱ्यांनी गोंयांतल्या मुंबय उच्च न्यायालयांत धांव घेतल्या, अशी म्हायती मुखार आयल्या.
पुलीस खात्यांत 1991 त उपनिरिक्षकपदाचेर रुजू जाल्ल्या स अधिकाऱ्यांक जाल्यार 1997 त रुजू जाल्ल्या 13 अधिकाऱ्यांक मेळून 19 जाणांक पुलीस अधिक्षकपदाचेर बडटी दिल्या. हे विशींचो आदेश कार्मीक खात्याचे अवर सचीव दुर्गा किनळेकार हांणी शुक्रारा 23 जानेवारीक जारी केला. म्हत्वाचें म्हणल्यार त्याच दिसा गोंय लोक सेवा आयोगान वयल्या अधिकाऱ्यांक पडटी दिवचे खातीर सरकारा कडेन शिफारस केल्या. अशेच पद्दतीचो आदेश डिसेंबर 2024 त कार्मीक खात्यान जारी करून गोंय नागरी सेवेच्या 43 कनिश्ठ अधिकार्यांक वरिश्ठ श्रेणी अधिकारीपदाचेर बडटी दिल्ली. तांचे बडटे खातीर लागपी सेवा काळ मर्यादा सदळ केल्ली. जाल्यार पुलीस खात्यांतल्या 19 अधिकाऱ्यांक खूब वर्सां हंगामी पद्दतीन पुलीस निरिक्षकपदाचेर सेवा दिले उपरांत पुलीस खात्यान 5 जानेवारी 2022 ह्या दिसा जाल्ल्या खात्याअंतर्गत बडटी समितीचे शिफारशी प्रमाण एका वर्सा खातीर कार्यवाहक (ऑफिशिएटींग) उपअधिक्षकपदाचेर बडटी दिल्ली. ते उपरांत तातूंत आनीक एका वर्साची वाड केली. 2024 त वयल्या अधिकाऱ्यांक नियमीत उपअधिक्षकपदाचेर बडटी दिली. अधिक्षकपदाचेर बडटे खातीर स वर्सांचो सेवा काळ गरजेचो आसा. तशेंच अधिकाऱ्यांक खात्याअंतर्गत प्रशिक्षण आनी परिक्षा दिवपाची अट आसा. ह्यो दोनूय अटी ऑगस्ट 2025 त सदळ केल्यात.
अधिक्षकपदाचेर बडटी जाल्ले पुलीस अधिकारी
सलीम शेख, विल्सन्स डिसोझा, फ्रान्सीस कॉर्त, रॉय पेरेरा, नालास्को रापोझ, ब्रांझ मिनेझीस, नूतन वेर्णेकार, गुरुदास कदम, सिद्धांत शिरोडकार, जिवबा दळवी, राजन निगळ्ये, राजेंद्र प्रभुदेसाय, नेर्लोन आल्बुकर्क, आशिष शिरोडकार, प्रवीणकुमार वस्त, सागर एकोस्कर, राजेश कुमार, तुषार वेर्णेकार आनी विश्वेश कर्पे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
