सर्वसमावेशकताय जिविताचो भाग जावचो

भांगरभूंय | प्रतिनिधी

राज्यपाल : ‘तुम भी चलो, हम भी चले’ उमेदीन

भांगरभूंय । प्रतिनिधी

पणजी : सगळे एकठांय रावले जाल्यारूच आमी फुडें पावतलें. गोंय घडोवपा खातीर सर्वसमावेशकताय हो फक्त विचार आसपाक जाय ना, जाल्यार तो जिविताचो भाग जावपाक जाय. सर्वसमावेशकताये खातीर दिव्यांग भुरग्यांक समान संद आनी माची उपलब्ध करपाची आमची सगल्यांची जापसालदारकी आसा, अशें राज्यपाल पुसापती अशोक गजपती राजू हांणी म्हणलें. धारबांदोड्यां रिजोनिया कंपनीचे ‘तुम भी चलो, हम भी चले’ कार्यावळींत मुखेल सोयरे ह्या नात्यान ते उलयताले.

धारबांदोड्या जाल्ले कार्यावळीक सभापती गणेश गांवकार, समाज कल्याण मंत्री सुभाष फळदेसाय, कला संस्कृती मंत्री रमेश तवडकार, आमदार कृष्णा साळकार, आदले खासदार विनय तेंडुलकार, जिल्हो पंचायत वांगडी मोहन गांवकार, रुपेश देसाय, सरपंच महेश नायक, बालाजी गांवस, रिजोनिया कंपनीचे मुखेल कार्यकारी अधिकारी अरूण शर्मा आनी हेर मानेस्त हाजीर आशिल्ले.

कोरिओग्राफर ममत चंडेल हांच्या मार्गदर्शना खाला संजय स्कूल (पर्वरी), आशादीप तशेंच हेर संस्थांच्या दिव्यांग भुरग्यांनी नाच तशेंच हेर कलांचें सादरीकरण केलें. कार्यावळीक थळाव्या लोकांची व्हड संख्येन उपस्थिती आशिल्ली.

संगीत आनी कला ह्यो फक्त मनरिजवण करपी गजाली नात, जाल्यार ती शांतिकाय, आत्मविस्वास निर्माण करपी साधनां आसात. कला, संगीत हांच्या शिक्षणान दिव्यांग भुरग्यां मदीं एक वेगळी उर्जा निर्माण जावपाक मजत जातली. उदरगत तशेंच सगल्या वाठारांत दिव्यांगांक संद तशेंच माची मेळपाक जाय. हो संदेश दिवपी ही कार्यावळ आसा, अशें राज्यपाल पुसापती अशोक गजपती राजू हांणी म्हणलें.

दिव्यांग भुरग्यांची देखभाल घेवपाक आवय बापायक खूब कश्ट घेवचे पडटात. दिव्यांग भुरग्यां मदीं लेगीत कला आसता, तांक आसता. समाज वा देश घडोवपा खातीर दर एकल्याचें योगदान गरजेचें थारता. दिव्यांगजनांक संद मेळ्ळी जाल्यार समाज वा देशा खातीर ते खूब कितें करपाक शकतात, अशें सभापती गणेश गांवकार हांणी सांगलें.

दिव्यांग भुरग्यांची कला पळोवन आमकां एक वेगळीच खोशी मेळ्ळ्या. दिव्यांग भुरग्यां मदीं कला आनी गुणवत्ता आसता हें कार्यावळींतल्यान दिसून आयलें. अशा भुरग्यांक योग्य ती संद मेळपाक जाय, अशें मंत्री सुभाष फळदेसाय हांणी सांगलें.

सांवड्डें मतदारसंघांत रोजगार निर्माण जावपा खातीर रिजोनिया सारके प्रकल्प जावपाक जाय. ह्या प्रकल्पांक लागून उदरगतीक हातभार लागपा सयत रोजगार तयार जातले, अशें आदले खासदार विनय तेंडुलकार हांणी सांगलें.

दिव्यांग भुरग्यां मदीं कसलोच उणाव नासता. तांचे मदीं वेगळी उर्जा आसता. तांची कला पळयले उपरांत खूब कितें शिकपाक मेळटा, अशें आमदार कृष्णा साळकार हांणी सांगलें. देश नेटान उदरगत करता. रिजोनिया कंपनीन धारबांदोड्यां सबस्टेशन उबारपा सयत 400 केव्ही विजेची लायन घातल्या. हो प्रकल्प गोंय तशेंच देशा खातीर मोलादीक आसा, अशें रिजोनिया कंपनीचे सीईओ अरूण शर्मा हांणी सांगलें.