भांगरभूंय | प्रतिनिधी
पणजीः सां-पेद्रु रायबंदर ते दिवाडे न्हयमार्गार एक वर्सा भितर रो रो फेरी धांवतली. रो रो फेरी खातीर खाशेले धक्के बांदपाच्या कामाक सुरवात जाल्या. इमेजीन पणजी स्मार्ट सिटी उदरगत महामंडळान हे धक्के बांदपा खातीर निविदा जारी केल्या.
स्मार्ट सिटीन जारी केल्ले निविदेंत म्हायती दिल्या, सुमार ४.८६ कोटी खर्चून सां-पेद्रु आनी दिवाडे हे दोनूय वटेन रॅम्प बांदतले. सगल्यांत उणी पावणी लावपी कंत्राटदाराक ह्या कामाचें कंत्राट मेळटलें. कंत्राटदारान दोन रॅम्पाचें काम १२ म्हयन्याच्या काळांत पावसाळी हंगाम धरून पुराय करपाक जाय. धक्के बांदले उपरांत स्मार्ट सिटी दोन धक्के न्हय येरादारी खात्याक सुपुर्त करतले.
फेरी रॅम्प उदरगत, जेटी बांधणी दर्यादेग बांदकाम, उदका भितर बांदकामाचो तीन कामाचो अणभव आशिल्ल्या कंत्राटदाराकूच हो कंत्राट मेळटलो. दोनूय धक्क्यांचें काम नव्यान हातांत घेतले. पयलींच्या धक्क्याची उदरगत जावची ना. पयलींच्या फेरी धक्क्याक तेंकूनच रो रो फेरी खातीर आधुनीक धक्के तयार जातले, अशें निविदेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
