सर्वेक्षणावेळारूय वाद: फाल्यां पुराय तोयार तळ्याच्या वाठाराचें सर्वेक्षण

भांगरभूंय | प्रतिनिधी

पणजी : तोयार तळ्याच्या वाठाराच्या सर्वेक्षणावेल्यान अधिकारी आनी आंदोलन करपी ग्रामस्थांमदीं वाद जाल्ल्यान आयज सर्वेक्षण सुरू जावंक ना. तोयार तळें ते प्रस्तावीत युनीटी मॉला मेरेन पुराय वाठाराचें सर्वेक्षण आतां फाल्यां, शेनवारा सुरू जातलें. मेजमाप तशेंच ड्रोनाचे मजतीन हें सर्वेक्षण जातलें, अशी म्हायती अधिकार्‍यांनी दिली.
इतले मजगती युनिटी मॉला आड चिंबल ग्रामस्थांचें आंदोलन आयज २६ व्या दिसा चालूच उरलें. मुख्यमंत्री डॉ. प्रमोद सावंत आनी चिंबल ग्रामस्थ हांचे मदीं बुधवारा जाल्ले बसकेंत तोयार तळ्याचो प्रभावीत वाठार (झोन ऑफ इन्फ्लूएंस) निश्‍चीत करपा सयत युनीटी मॉल मेरेनच्या जाग्याचें सर्वेक्षण करपाचेर एकमत जाल्लें. मात ग्रामस्थांच्या मागणे प्रमाण युनीटी मॉल रद्द करपाची सरकाराची तयारी नाशिल्ल्यान बसकेंत तोडगो आयलो ना. तरी बसकेंत थारिल्ले प्रमाण पर्यटन तशेंच उदका पुरवण खात्याचे अधिकारी आयज शुक्रारा सर्वेक्षण करपा खातीर आयिल्ले. अधिकार्‍यांनी फकत सर्वे नंबर ४०/१चे सर्वेक्षण करपाक सुरवात केली. हाका ग्रामस्थांनी हरकत घेतली. तोयार तळें फकत ४०/१ सर्वे नंबरांत ना. तळ्याचो मुखेल भाग (हायस्ट पॉयंट) हो दुसर्‍या सर्वेंत येता. हाका लागून पुराय तळें आनी प्रस्तावीत युनिटी मॉल मेरेनच्या जाग्याचें सर्वेक्षण करपाची मागणी ग्रामस्थांनी केली. हाका लागून वाद जालो. ग्रामस्थांची बाजू मांडपी आदोगाद ऍड. मेलीसा सिमोयस आनी हेरांनी ४०/१ सयत तळें आशिल्ल्या हेर जमिनीचो सर्वे करपाची मागणी केली. हाका लागून शुक्रारा सर्वेचें काम सुरू जावपाक पावलें ना.
ग्रामस्थांच्या मागणे प्रमाण फाल्यां शेनवारा तोयार तळ्याच्या पुराय वाठाराचें सर्वेक्षण सुरू जातलें. मेजमाप तशेंच ड्रोनाच्या आदारार सर्वेक्षण जातलें. सर्वेक्षणाक तीन ते चार दीस लागतले, अशें जीटीडीसीचे मुखेल अभियंते प्रमोद बदामी हांणी सांगलें.

तोयार तळ्याविशीं परतून अधिसुचोवणी जारी जावची : गोविंद शिरोडकार
एनआयओन जे दोन अहवाल दिल्या ते परस्परविरोधी आसा. हाका लागून आतां सर्वेक्षणा उपरांत तोयार तळ्याचें प्रभाव क्षेत्र (झोन ऑफ इन्फ्लुएन्स) कळटलें. हे प्रमाण अधिसुचोवणी जारी जावपाक जाय, अशें चिंबल जैवविविधताय मंडळ समितीचे अध्यक्ष गोविंद शिरोडकार हांणी सांगलें.