केंद्रीकृत सामाईक समापन मुल्यांकन परिक्षेच्यो तारखो जाहीर

भांगरभूंय | प्रतिनिधी

पणजी : गोंय राज्य शिक्षणीक संशोधन आनी प्रशिक्षण परिशदे (एससीईआरटी) वरवीं घेवपी दुसर्‍या कुशळटाय आदारीत केंद्रीकृत सामाईक समापन मुल्यांकन परिक्षेच्यो तारखो जाहीर केल्यात. यत्ता ५वी ते ८वेच्या विद्यार्थ्यां खातीर ही परिक्षा ५ मार्च सावन सुरू जावपाची आशिल्ल्यान यत्ता ३री आनी चवथे खातीर ६ एप्रील सावन परिक्षा घेतले. हे परिक्षेक राज्यभरांतल्यान सुमार १.२० लाखां परस चड विद्यार्थी बसतले.
‘एससीईआरटी’न स्पश्ट केलां, खेळां सर्तींत वांटेकार वा वैजकी कारणांक लागून जे विद्यार्थी परीक्षेक हाजीर रावचे ना, तांचे खातीर अतिरिक्त परिक्षा आयोजीत करतले. अशा विद्यार्थ्यां खातीर स्वतंत्र प्रश्नपत्रिका आनी वेळापत्रक दितले.
परिपत्रका प्रमाण, यत्ता ५वी ते ८वे खातीर प्रस्न पत्रिका एससीईआरटी दितलें. उत्तरपत्रिका शाळांनी उपलब्ध करून दिवपाच्यो आसात. जाल्यार यत्ता तिसरी आनी चवथे खातीर प्रस्न पत्रिका आनी जाप पत्रिका एकठांय दितले. प्रस्नपत्रिका २३ फेब्रुवारी सावन वाटपाक सुरवात जावपाची शक्यताय आसा.
राज्यांतल्या सगल्या शाळांनी मुल्यांकनांत एकसमानता आनी मानकीकरण हाडपाच्या हेतान ह्या शिक्षणीक वर्सा सावन केंद्रीकृत सामाईक समापन परिक्षा सुरू केल्या. फाटल्या वर्सा ऑक्टोबरांत जाल्ले पयले परिक्षेचे तुळेंत अंदूं प्रस्न पत्रिकांचे तुळेंत सोप्यो आसतल्यो. मात राष्ट्रीय शिक्षण धोरण २०२० प्रमाण अनुप्रयोगाधारीत प्रस्नांचो आसपाव कायम उरतलो, अशें एससीईआरटीन स्पश्ट केलें.
परिक्षा प्रक्रियेचेर लक्ष दवरपा खातीर ‘फ्लाइंग स्क्वॉड’ वरवीं अचकीत तपासण्यो करतले अशेंय शाळांक कळयलां. ही परीक्षा गोंयच्या सगलया शाळां खातीर बंधनकारक आशिल्ल्यान, नेम मोडल्यार गंभीर दखल घेतले, अशी शिटकावणीय एससीईआरटीन दिल्या.
तोखणाय करपा सारकी गजाल म्हणल्यार, फाटल्या वर्सा जाल्ले पयले केंद्रीकृत परीक्षे उपरांत पालकां कडल्यान खर तिडक उक्तायल्ली. सात-आठ वर्सांच्या ल्हान भुरग्यां खातीर प्रस्न पत्रिका सामकी कठीण आशिल्ल्याचो आरोप करतना पालकांनी ३डी तांक आनी तर्कशक्तीचेर प्रस्नांविशीं आक्षेप नोंद केल्लें. अंदूं मात ते फाटभूंयेर प्रस्न पत्रिका अदीक सोपे दवरपाचें आस्वासन एससीईआरटीन दिलां.