भांगरभूंय | प्रतिनिधी
पणजी : आयएएस, आयपीएस, आयएफएस आनी गोंय पुलीस तशेंच नागरी सेवेंतले अधिकारी, मामलेदार, बीडीओ हांकां सगल्यांक रामदेव बाबा योगाचे धडे दितले. 24 जानेवारीक योगसेतू लागसार फांतोडेर 4.30 वरांचेर हाजीर रावपाची सुचोवणी नियोजन आनी सांख्यिकी संचालनालयान परिपत्रका वरवीं दिल्या.
नियोजन, सांख्यिकी आनी मूल्यमापन संचालनालय पतंजली रिसर्च फावंडेशन, हरिद्वार हांच्या जोडपालवान भारत आंतरराष्ट्रीय आयुर्वेद आनी वेलनेस एक्स्पो तशेंच शिखर परिशद 2026 हाची पयली आवृत्ती घडोवन हाडटले. तीन दीस चलपी ही कार्यावळ 23 ते 25 जानेवारी ह्या काळांत डॉ. श्यामा प्रसाद मुखर्जी इंडोअर स्टेडियम, बांबोळी, गोंय हांगा जातली.
आयुर्वेद, वेलनेस आनी समग्र भलायकी पद्दतींचो प्रचार करपाचो हेत ह्या एक्स्पो आनी शिखर परिशदेचो आसा. देश-विदेशांतले तज्ञ, संशोधक, वैद्य आनी धोरण निर्माते हे कार्यावळींत एकठांय येवन परंपरीक वैजकी आनी वेलनेस क्षेत्रांतलें ज्ञान, नवकल्पना आनी उत्तम पद्दतींचो आस्पाव हे कार्यावळींत जातलो.
हे कार्यवळीचो एक भाग म्हण बाबा रामदेव हांचें विशेश योग सत्र 25 जानेवारीक फांतोडेर 5 वरांचेर योग सेतू लागसार भगवान परशुराम पुतळ्याचे सुवातेर जावपाचे आसा. हें योग सत्र शारीरिक, मानसीक आनी आध्यात्मीक भलयाकी राखपाक योगाचें म्हत्त्व अधोरेखीत करपाची मोख धरून आयोजीत केलां. हे विशीं आयएस, आयएफएस, आयपीएस, गोंय नागरी सेवेचे वरिश्ठ आनी कनिश्ठ श्रेणी अधिकारी, गोंय पुलीस सेवेचे वरीश्ठ आनी कनिश्ठ श्रेणी अधिकारी, विभागप्रमुख, मामलतदार, संयुक्त मामलतदार, दक्षता अधिकारी आनी गट उदरगत अधिकारी ह्या योग सत्रांत वाटेकार जावपाचे निर्देश संचालनालयान परिपत्रका वरवीं दिल्या.
सगल्या अधिकार्यांनी फांतोडेर 4.30 वरांचेर सुवातेर आपली हजेरी लावची. योग सत्रा खातीर ड्रेस कोड धवे टी-शर्ट आसतलो. अधिकार्यांक सुवातेर धवें टी-शर्ट आनी योगाची शेंदरी दितले. हे आदेश सक्षम प्राधिकरणाच्या मंजुरीन जारी केल्लो आसा, अशें परिपत्रकांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
