भांगरभूंय | प्रतिनिधी
पणजी : धावेचे परिक्षेंत सुदारीत कॉम्पेसेशन येवजणेक लागून निकाल 2 टक्यांनी वाडपाची शक्यताय आसा. धावेचो निकाल सेगीत 90 टक्यां वयर लागता. हे येवजणेक लागून निकाल वाडटलो, मात खूब फरक पडपाची शक्यताय ना.
धावेचो निकाल हालींच्या वर्सांनी 90 टक्यां परस चड लागता. हाका लागून जे विद्यार्थी अभ्यास करतात ते समाधानकारक गूण मेळोवन पास जातात. जे विद्यार्थी नापास जातात ते दोन परस चड विशयांनी नापास जातात. दोन परस चड विशयांनी नापास जाले जाल्यार कॉम्पेसेशन येवजण लागू जावची ना. तशेंच कांय नापास विद्यार्थ्यांक 10 टक्के परस उणें गूण मेळटात. हाका लागून तांकां येवजणेचो लाव मेळप शक्य जावचें ना. तरी लेगीत नापास जावपी 2 ते 3 टक्के विद्यार्थी हे येवजणेक लागून पास जातले असो अदमास शालान्त मंडळाचे अध्यक्ष भगीरथ शेट्ये हांणी उक्तायलो. चडांत चड नापास विद्यार्थ्यांक लाव जावचो आनी तांचे वर्स वाटावचे हे खातीर हे येवजणेत सुदारणा केल्या, अशें तांणी सांगलें. राष्ट्रीय शिक्षण धोरणाचे कार्यवाहीक लागून परिक्षेचे पद्दतींत बदल जाला. तशेंच आतां दरेका विशयांत अंतर्गत गुणाक लागून लेगीत निकालाची टक्केवारी वाडपाक मजत जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
