भांगरभूंय | प्रतिनिधी
पेडणें: प्राचार्य लक्ष्मीकांत पार्सेकार हे मुख्यमंत्री आसतना तांणी शंभर खाटांची १०० कोटी परस चड खर्च करून तुयें हॉस्पिटल इमारत उबारिल्ली. हें हॉस्पिटल बांबोळी हॉस्पिटलाक लिंक जावचें अशी तांणी येवजण आशिल्ली. तांचे उपरांत वेंचून आयिल्ल्या लोकप्रतिनिधीक तशें येस मेळूंक ना. मात आमदार जीत आरोलकार हे वेंचून आयले उपरांत तांणी उरिल्लें हॉस्पिटल इमारतीचें बांदकाम पुराय करपा वांगडा हेर सुविधा विशीं टँडर काडपाचें काम सरकारा वरवीं सुरू केलें आनी निमाणें तुयें हॉस्पिटलाक गोमेकॉ हॉस्पिटलाक लिंक करपाची अधिसुचवणी सरकारान काडून एक बरो निर्णय दिल्ले खातीर ह्या निर्णयाक सगले येवकार दितात.
तुयां हॉस्पिटल लिंक हॉस्पिटल जावचें, बांबोळे हॉस्पिटलांत ज्यो ज्यो सुविधा आसात, तशेच तरेची सेवा तुयां हॉस्पिटलांत उपलब्ध जावची. हे खातीर जनतेची मागणी आशिल्ली. तशेंच हे खातीर तुयें हॉस्पिटल कृती समितीन जायते फावटीं सरकाराक, आमदाराक निवेदन सादर करून हें बांबोळे हॉस्पिटलाक लिंक करपाची मागणी केली.. चळवळ उबारली आनी हे चळवळींत आंदोलनांत तुयें हॉस्पिटल कृती समिती वांगडाच पेडणें तालुका विकास समिती, पेडणे नागरीक समिती, विवीध समिती, सामाजीक कार्यकर्ते, म्हालांतले सरपंच, उपसरपंच, पंच हांणी बरेच यत्न केले. तशेंच हें हास्पिटल गोमेकॉ कडेन जावचे खातीर पांच दीस धरणें आंदोलन करून उपरांत व्हड मशाल यात्रा काडली. हाची दखल आमदार जीत आरोलकार हांणी घेतली. तशेंच मुख्यमंत्री डॉक्टर प्रमोद सावंत, भलायकी मंत्री विश्वजीत राणे हांकांय घेवची पडली. आंदोलन कर्त्यांची एकूच मागणी आशिल्ली. तुयें हॉस्पिटल बांबोळी हॉस्पिटलाक लिंक करून बरी सेवा उपलब्ध करची. आनी हें आंदोलन खंयच्याय एका राजकीय पक्षाच्या आड वा आमदारांच्या आड वा सरकारच्या आड नाशिल्लें. हाका लागून हजारांनी संख्येन नागरीक मशाल मिरवणुकेंत वाटेकार जाल्ले. हे मिरवणुकेची दखल आमदारांनी घेतली. तशेंच सरकारानूय घेवन तुयें हॉस्पिटल गोमेकॉ कडेन लिंक करपाची अधिसुचवणी जाहीर केलें. आतां सगले कडेन ह्या निर्णयाक येवकार दितना दिसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
