भांगरभूंय | प्रतिनिधी
रिणांतल्यान सादनसुविदा, रोजगार निर्मिती जावची
पणजी : शेतकार, बायलां, तरणाटे आनी आप मजत गटांक बेगीन आनी सोपेपणान रीण मेळचें म्हूण नाबार्ड तशेंच बँकांनी वेवस्था तयार करची, असो उलो मुख्यमंत्री डॉ. प्रमोद सावंत हांणी मारला. नाबार्ड आयोजीत रिणाचेर आदारीत परिसंवादाच्या उक्तावणाक ते उलयताले. ह्या वेळार मुखेल सचीव डॉ. कांडावेलू तशेंच नाबार्ड आनी बँकांचे अधिकारी हाजीर आशिल्ले.
रिणाचो शेतकार, आप मजत गट हांकां मालमत्ता तशंच भांडवल तयार करपाक आदार जावपाक जाय. मालमत्ता आनी भांडवलांतल्यान तरणाटे, शेतकार आनी बायलांनी रोजगार संद तयार करपाक जाय. हाका लागून रिणाचो उपेग रोजगार निर्मितींत जावपाची गरज आसा. हाचे खातीर नाबार्ड तशेंच हेर बँकांनी शेतकार, आप मजत गट तशेंच बायलांक सवलतीींत आनी सोपेपणान रिण दिवप गरजेचें, अशें डॉ. सावंत हांणी सांगलें.
शेती, नुस्तेंमारी वाठारा खातीर बर्योच येवजण्यो आसा. हे येवजणेक रिणाची जोड मेळ्ळी जाल्यार शेती, नुस्तेमारी वाठाराची उदरगत जातली. रोजगार संदी तयार जातल्यो आनी गोंय स्वयंपूर्ण जावपाक मजत जातली. गोंय हे फकत पर्यटनाचेर निंबून उरपाक जाय ना. शेती, नुस्तेंमारी आनी सहकार वाठारांतले हें आघाडीचें थळ जावपाक जाय. नुस्तें तशेंच शेतीच्या उत्पादनाच्या निर्गतींत लेगीत मोठी संद आसा. हातूंतल्यान उद्येजक तयार जातले. हाका लागून फुडाराक नाबार्ड तशेंच हेर बँकांचो तेंको आनी सहकार्य मोलादीक थारतलो, अशें डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
