भांगरभूंय | प्रतिनिधी
पणजी : हडफडेंचे तेन्नाचे सरपंच रोशन रेडकार हांकां हणजूण पुलिसांनी निमाणी अटक केली. बर्च क्लबाक दिल्ल्या परवान्यांक लागून ते वादांत सांपडिल्ले. बुधवारा गोंयच्या मुंबय उच्च न्यायालयान अटकपूर्व जामीन अर्ज भायर मारले उपरांत रोशन रेडकर निमाणे आयज सकाळीं म्हापशें न्यायालयांत शरण आयले.
अटकपूर्व जामीन मेळचो म्हणून तांणी उच्च न्यायालया मेरेन धांव घेतली. मात, न्यायालयान अर्ज भायर मारिल्ल्यान, आनी पर्याय नाशिल्ल्यान रोशन रेडकार बिरेस्तारा सकाळीं म्हापशें न्यायालयांत शरण आयले उपरांत तांकां हणजूण पुलिसांनी अटक केली. ह्यान पयलीं पंचायत खात्याने सरपंच म्हणून ताका अपात्र थारायिल्ले.
बुधवारा उच्च न्यायालयान रेडकार हांचो अटकपूर्व जामीन अर्ज भायर मारिल्लो. गोंयच्या मुंबय उच्च न्यायालयाचे न्या. आशिष चव्हाण हांणी हे विशीं आदेश दिल्ले. रोशन रेडकार पंचायत कर्मचारी आनी संबंदीतांचेर प्रभाव घालपाच्या पदार आशिल्ले. हाका लागून ते साक्षीदारांक धमकावपाक शकता वा तांचेर प्रभाव घालून पुराव्यांत हस्तक्षेप करपाक शकता. ताका जेन्ना चवकशे खातीर आपयल्ले, तेन्ना तांणी जमाव करून तपासांत आडमेळें हाडिल्लें, अशें निरीक्षण नोंद करून बर्च क्लबांतलो अग्नि्तांडव प्रकरणांत रोशन रेडकार हांचो अटकपूर्व जामीन अर्ज न्यायालयान भायर मारिल्लो.
७ डिसेंबर २०२५ दिसा पुलिसांनी रोशन रेडकार हांकां चवकशे खातीर पुलीस स्टेशनांत आपयिल्ले. तेन्ना सुमार १०० लोक एकठांय करून पुलिसांचेर चेंपण हाडपाचो आनी तपासात आडमेळीं हाडपाचो यत्न तांणी केल्लो, असो आरोप सरकारान पक्षान दवरिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
