ह्या सप्तकांत बँको चार दीस बंद

भांगरभूंय | प्रतिनिधी

२७ जानेवारीक बँकांचो देशव्यापी संप

पणजीः युनाटेड फोरम ओफ बँक युनीयन हांणी जाहीर केल्लें एका दिसाचें राष्ट्रवापी आंदोलन आनी सप्तकाच्या़ निमाणे कडेन येवपी सुटयेक लागून गोंयच्यो सगळ्यो बँको २४ जानेवारी ते २७ जानेवारी २०२६ हे चार दिस बंद आसतल्यो, युनाटेड फोरम ऑफ बँक युनीयनचे निमंत्रक संतोष हळदणकार हांणी सांगलें.
म्हयन्याचे फक्त दोनूच शेनवार सोडून म्हयन्याचे सगळे शेनवार हे बँके खातीर सुटी जाहीर करची मागणी धरून लावपा खातीर हो बंद जाहीर केल्ल्याचें, हळदणकार हांणी सांगलें.
सद्या दुसरो शेनवार आनी चवथो शेनवार हो बँके खातीर सुटयेचो दीस आसता. मात म्हयन्यांतले सगळे शेनवार बँके खातीर सुटी म्हण जाहीर करून सप्तकाचे पांच दीस हे कामाचे दीस आसचे अशी एक समजातकायेची कबालता भारतीय बँक संघटना आनी युनाटेड फोरम ऑफ बँक युनीयन हांचे मदी वर्स २०२३त जाल्लो. हे कबलातीक सरकारी मान्यताय दिवची, अशी मागणी हळदणकार हांणी केली.
सगळे शेनवार हे बँके खातीर सुटी जाहीर करतले अशें आस्वासन आमकां त्या वेळार दिल्लें. मात अजून मेरेन हो विशय प्रलंबीत आसात. तशीच ही मागणी सरकार दरबारी मांडल्या. मात दोन वर्सां जालीं अजूनय आमी सरकारी मान्यतायेची वाट पळयतात, अशें हळदणकार हांणी सांगलें.
सरकारा वटेन कसलोच प्रतिसाद येवंक नाशिल्ल्यन बँक युनीयनान २४ आनी २५ मार्च २०२५त दोन दिसांचो संप जाहीर केल्लो. मात त्या वेळार ह्या विशयाचेर सक्रीय चर्चा चालू आसा अशें आमकां कळयले उपरांत आमी हें आंदोलन फुडें धुकल्लें. मात आजूनय सरकारान ही मान्यताय दिवंक नाशिल्ल्यान आमी २७ जानेवारीक देशभर बँको बंद दवरून वेगवेगळे पध्दतीन निदर्शनां जाहीर केल्ल्याचें हळदणकार हांणी म्हणलें.

देखून येता त्या सप्तकांत बँको चार दीस बंद आसतल्यो २४, शेनवार, २५, आयतार आनी २६ वेर गणतंत्र दीस ही भौशीक सुटी आसतली. २७वेर आमच्या संपाक लागून गोंयच्यो सगळ्यो बँको बंद आसतल्यो. देखून लोकांनी आपल्या बँके संबंधीच्या कामांचें पयलीच नियोजन करचें. जी गैरसोय जातली ताचे खातीर आमी माफी मागतात, अशें हळदणकार हांणी सांगलें.
अर्थीक क्षेत्र जशे की आरबीआय, एलआयसी आनी जीआयसी शेनवारची सुटी जाहीर जाल्या. केंद्र आनी राज्य सरकाराच्यो सगळ्यो कचेर्‍यो सोमार ते शुक्रार मेरेन उक्तो आसतात. शॅअर बाजार सोमार ते शुक्रार मेरेन चालू आसातात देखून पयश्यांचो बाजार, फॉरेन एस्कचेंज शेनवारा जायनात. देखून बँको सोमार ते शुक्रार मेरेन चलल्यार गिरायकांचेर व्हडलो परिणाम जावचो ना, असो युक्तिवाद हळदणकार हांणी केला.