भांगरभूंय | प्रतिनिधी
ग्रामीण उदरगत सचीव अर्जून मोहन हांची म्हायती
पणजीः नवीन विसकीत भारत- रोजगार आनी उपजिविका मिशन (जी राम जी) रोजगाराची गेरंटी दिवपाचे दीस 100 दिसा वेल्यान 125 दिसां मेरेन केल्यात. ते भायर हे येवजणेंत जल सुरक्षा, उपजिविका संबंदी सुविधधा आनी मुखेल मुळाव्यो सुविध ह्या तीन नवीन घटकांचो आस्पाव केला अशी म्हायती ग्राम उदरगत सचीव अर्जून मोहन हांणी सांगलें.
पणजे जी राम जी हे येवजणे विशीं म्हायती दिवपा खातीर पत्र सुचना कार्यालयान घडोवन हाडिल्ले वार्तालाप सत्रांत बीजभाशण करतना अर्जून मोहन उलयताले. ह्या वेळार पंचायत खात्याचे उपसंचालक प्रसिध्द नायक हांणी जी राम जी येवजणेच्या वेव्हारीक पैलुंची अंमलबजावणी, शिरोडें पंचायतीची सरपंच मेघना शिरोडकार हांणी ग्रामपंचायत आनी ग्रामसभेची भुमिका आनी अॅड. अक्षता पुराणीक भट हांणी कायदेशीर पैलू ह्या विशयांचेर म्हायती दिली.
विकसीत भारत जी राम जी हो एक नवो कायदेशीर आराखडो आसा आनी हो विकसीत जावपाक वेळ लागतलो. ही येवजण खासा करून गांवगिऱ्या वाठारांतल्या लोकां खातीर आसा जी रोजगारांची गेरंटी सयत जापसालदारकी दिता अशें मोहन हांणी सांगलें.
जी राम जी हो नवीन कायोद महात्मा गांधी राष्ट्रीय ग्रामीण रोजगार मिशन (मनरेगा) हाची सुवात घेता. मनरेगाची अंमलबजावणी 2005 सावन जायत आयल्या. पूण फाटल्या 20 वर्सांच्या काळांत देश विकसीत जाला आनी ग्रामीण समृध्दीत सुदारणा जायत आसा. देखून ही नवी येवजण चालीक लायिल्ल्याचें मोहन हांणी म्हणलें.
हे नवे येवजणेंत आमी नव्या पैलुचो आस्पाव केला. पयलो म्हणटा तो जल संरक्षण. शार आनी ग्रामीण वाठारांत जल सुरक्षा ही एक महत्वाची गजाल जावन रावल्या. देखून जी राम जी कायद्या खाला आमचें लक्ष जल सुरक्षा संंबंदी सुविधांचेर आसतलें. तशेंच एका सामान्य मनशाक बाजारपेठ उपलब्ध करून दिवपा खातीर आमी उपजिविका संबंदी सुविधा हया पैलुचो आस्पाव केला अशी म्हायती मोहन हांणी दिली.
तशेंच मुखेल मुळाव्यो सुविधा ह्या पैलुचो आस्पाव करून शाळा, होस्पिटल आनी रस्ते ह्यो सुविधा ह्या कायद्या खाला आसतल्यो. गांवांतल्या लोकां खातीर वा सामुदायीक नदरेन ज्यो सुविधा गरजेच्यो आसात त्या नव्या कायद्या खाला हातांत घेवन प्राधान्य दितले. तशेंच हवामान बदलाच्यो घडणुको लक्षांत घेवन ज्यो आमी सुविधा उबारतले हे हवामान बदल संवेदनशील आसतले अशें मोहन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
