भांगरभूंय | प्रतिनिधी
मालमत्तेची म्हायती दिवन सहकार्य करपाची नागरिकांक सुचोवणी
पणजी: नकशा उपक्रमाखाला पणजे आनी ताळगांव वाठारांत जमनी तशेंच हेर मालमत्तेचें सर्वेक्षण सुरू जालां. घर तशेंच जमनीच्या धनयांनी सर्वेक्षण अधिकारी वा कर्मचाऱ्यांक म्हायती दिवन सहकार्य करचें अशें समजीकाय आनी जमीन नोंदणी कार्यालयान कळीत केलां.
सर्वेक्षण डिजिटल पद्दतीन जातलें. तरी गरज आसा थंय पळोवणी तशेंच मेजणी जातली. जमनी संबंदी वाद, नियोजन तशेंच आपत्ती वेवस्थापना खातीर नकशा कार्यावळी खाला पुराय गोंयचे सर्वेक्षण जातलें. पांवंड्या पांवड्यान सर्वेक्षणाचें काम पुराय जातलें.
सर्वेक्षणा वेळार घर तशेंच मालमत्तेच्या धनयांनी हाजीर रावन म्हायती दिवन सहकार्य करचें. सर्वेक्षणाचो वावर 10 दीस चलतलो. आल्तीन, नेवगी नगर, सांतिनेज, अवर लेडी ऑफ इमॅक्युलेट, मळा, मिरामार, कांपाल, सांतिनेज, करंजाळे, दुर्गावाडी – ताळगांव ह्या वाठारांनी सर्वेक्षण जातलें. गावगिरो वाठार शारी वाठारांत घालपाचो हेत हाचे फाटल्यान आसा, अशी चर्चा आशिल्ली. हो समज चुकीचो आसा. सध्या जे गांवात जो वाठार आसा तो त्याच गांवांत उरतलो. फक्त घरां, बांदकामां हांची नोंद जावपा खातीर हे सर्वेक्षण जातलें, अशी म्हायती अधिकाऱ्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
